سابق صدرآصف زرداری کو پمزاسپتال سے ڈسچارج کرکے اڈیالہ جیل منتقل کردیا گیا۔

تفصیلات کے مطابق پمزاسپتال میں سابق صدرکے مختلف ٹیسٹ کیے گئےتاہم کارڈیک سینٹرمیں کچھ ٹیسٹ باقی رہ گئےلیکن آصف زرداری کو بکتر بند گاڑی میں  جیل منتقل کیا گیا۔

سابق صدرکی آصف زرداری کی صاحبزادی آصفہ بھٹو کا کہنا تھا کہ مجھے والد صاحب سے  ملنے نہیں دیا گیا،نہ ہی میڈیکل رپورٹس دکھائی گئیں۔

آصف زرداری کی صاحبزادی آصفہ بھٹو نے یہ بھی کہا کہ ڈاکٹرزکی رپورٹ کےمطابق4سینئرڈاکٹرز نےمعائنہ کے بعد زرداری صاحب کوفزیوتھراپی کا مشورہ دیا،انھوں نے کہا کے ڈاکٹرز کا کہنا ہے کہ آصف زرداری  کے دل کی 3 شریانیں بند ہیں،انہیں اسپتال میں رہنا چاہیے۔

آصفہ بھٹو نے مطالبہ کیا ہے کہ زرداری صاحب کو واپس اسپتال لے جایا جائے اور مناسب علاج کیا جائے،اگراُنہیں کچھ ہوا تو حکومت ذمہ دار ہوگی۔

دوسری جانب پیپلز پارٹی کے رہنماوں نے آصف زرداری کی صحت پر تشویش کا اظہارکیا۔ پیپلز پارٹی کی سینئر رہنما سینیٹر شیری رحمان نے اس اقدام پر ردعمل دیتے ہوئے کہا ہے کہ آصف زرداری کو ڈاکٹر کی تجویز کے برعکس جیل بھیج دیا گیا،آصف زرداری کی صحت سے متعلق اہل خانہ کو بھی نہیں بتایاگیا۔انہوں نے کہا کہ آصفہ بھٹو کو اسپتال میں والد سےملنے نہیں دیا گیا، حکومت انتقام پراترآئی ہے۔

واضح رہے اس سے قبل پمز اسپتال کے سینئر ڈاکٹروں پر مشتمل ٹیم نے وزارتِ داخلہ کی درخواست پر پیپلز پارٹی کے شریک چیئرمین کا اڈیالہ جیل میں ابتدائی طبی معائنہ کیا تھا جس کے بعد انہیں فوری طور پر اسپتال منتقل کرنے کا فیصلہ کیا گیا، جس کے بعد چیئرمین پیپلزپارٹی کوگزشتہ روزجیل سے کارڈیک سینٹر  ٹیسٹ کے لیئے شفٹ کیا گیا تھا۔