وزیر خارجہ شاہ محمود قریشی  نے صومالی وزیر خارجہ بلال محمد عثمان سے ملاقات  کی ہے۔

تفصیلات کے مطابق  وزیر خارجہ شاہ محمود قریشی  نے او آئی سی وزرائے خارجہ کونسل کے 47 ویں اجلاس کے موقع پر صومالی وزیر خارجہ بلال محمد عثمان سے ملاقات  کی۔

دوران ملاقات دو طرفہ تعلقات ،اقتصادی تعاون کے فروغ سمیت باہمی دلچسپی کے امور پر تبادلہ خیال کیا گیا۔

وزیر خارجہ نے کہا کہ  پاکستان اور صومالیہ کے مابین دیرینہ تعلقات ہیں ۔  پاکستان، اسلامی برادر ملک ہونے کے ناطے صومالیہ کے ساتھ دو طرفہ تعلقات کے مزید فروغ کو خصوصی اہمیت دیتا ہے ۔

شاہ محمود قریشی نے صومالی وزیر خارجہ کو پاکستان کی ’انگیج افریقہ‘ پالیسی کے بارے میں آگاہ کیا۔

 صومالیہ کے وزیر خارجہ نے پاکستان کے اس اقدام کو سراہتے ہوئے صومالیہ کے لیے پاکستان کی مستقل معاونت پر وزیر خارجہ کا شکریہ ادا کیا۔

صومالی وزیر خارجہ نے ملک کی مجموعی صورتحال کے حوالے سے وزیر خارجہ شاہ محمود قریشی کو آگاہ کرتے ہوئے بتایا کہ صومالیہ میں امن و امان کی صورتحال بہتری کی جانب گامزن ہے۔

صومالی وزیر خارجہ نے کہا کہ صومالیہ، انسداد دہشت گردی کے حوالے سے پاکستان کے تجربات سے استفادہ حاصل کرے گا۔

وزیر خارجہ  نے پاکستان کی طرف سے صومالیہ کی تعمیر و ترقی اور معاشی بحالی  کے لیے تعاون جاری رکھنے کی یقین دہانی کروائی ۔

دونوں وزرائے خارجہ کے مابین دو طرفہ اقتصادی تعاون کے حوالے سے روابط کے فروغ پر اتفاق ہوا۔