وزیر اعلیٰ پنجاب سردار عثمان بزدار کاکہنا ہے کہ پی ڈی ایم کا ٹولہ جلسوں کے ذریعے کورونا پھیلارہا ہے۔

تفصیلات کے مطابق وزیر اعلیٰ پنجاب سردار عثمان بزدار سے معاون خصوصی اطلاعات ڈاکٹر فردوس عاشق اعوان  نے ملاقات کی۔

ملاقات میں وزیراعلیٰ عثمان بزدار نے معاون خصوصی اطلاعات کو حکومت کی کارکردگی اورفلاح عامہ کے منصوبوں کو موثر انداز سے اجاگر کرنے کی ہدایت کی۔

عثمان بزدار نے کہا کہ پی ڈی ایم کے شرانگیز بیانیے کا بھر پور جواب دیا جائے۔ عوام کو ریلیف دینے اور گڈ گورننس  کے لیے کیے گئے اقدامات کو بہترین طریقے سے عوام کے سامنے لایا جائے۔

انہوں نے کہا کہ ہر کام مشاورت سے اورایک ٹیم کے طورپر کام کررہے ہیں۔2 برس کے دوران وہ کام  کیے جو سابقہ حکومتیں برس ہا برس نہ کر سکیں۔

وزیر اعلیٰ پنجاب نے کہا کہ صوبے میں ون مین شو کاخاتمہ کیا ہے۔ حکومت کے بروقت فیصلوں سے آٹے اورچینی کی قیمتوں میں استحکام آیا ہے۔ پنجاب واحد صوبہ ہے جہاں 20کلو آٹے کا تھیلہ مقررکردہ نرخوں پر دستیاب ہے۔ سہولت بازاروں میں چینی 81 روپے میں مل رہی ہے۔

عثمان بزدار نے کہا کہ  ہمارا مقصد عوام کو ریلیف دینا اوران کے لیے آسانیاں پیدا کرنا ہے۔ عوام کے حقوق پرکسی کو ڈاکہ نہیں ڈالنے دوں گا۔

ان کا کہنا تھا کہ  اپوزیشن جماعتوں کا پاکستان مخالف بیانیہ پٹ چکا ہے۔پی ڈی ایم کا ٹولہ جلسوں کے ذریعے کورونا پھیلارہا ہے۔ عوام کے مسترد شدہ عناصر کے دلوں میں دکھی انسانیت  کے لیے رتی بھر درد نہیں ہے۔

معاون خصوصی اطلاعات کا کہنا تھا کہ  حکومت کے عوامی فلاح کے کاموں کو بہترین طریقے سے اجاگرکرنے  کے لیے حکمت عملی بنالی ہے۔

فردوس عاشق اعوان نے کہا کہ  پی ڈی ایم کے سیاسی یتیم پہلے بھی ناکام رہے اورآئندہ بھی ناکام رہیں گے۔ اپوزیشن عناصر ملک دشمن عناصر کے ایجنڈے پر چل رہے ہیں۔

انہوں نے مزید کہا کہ اپوزیشن جماعتیں ہر محاذ پر ناکام ہو چکی ہیں۔  اقتدار کی ہوس میں مبتلا ٹولے کی آنکھوں پر کالی پٹی بندھ چکی ہے۔

معاون خصوصی  اطلاعات نے کہا کہ قوم کو وزیراعظم عمران خان کی شفاف قیادت پر پورا اعتماد ہے۔اپوزیشن اپنے جال میں خود پھنس چکی ہے۔ 22 کروڑ پاکستانی سرٹیفائیڈلٹیروں کے جھانسے میں نہیں آئیں گے۔