میکسیکو میں مسلح افراد کی فائرنگ سے 5 افراد ہلاک جبکہ ایک شخص زخمی ہوگیا۔

غیر ملکی خبررساں ادارے کے مطابق میکسیکو کے سیاحتی شہر کورناواکا میں بس اسٹیشن پر مسلح افراد کی فائرنگ سے 5 افراد ہلاک اور ایک شخص زخمی ہو گیا۔

میکسیکو کی ریاست مورلوس کے سیکیورٹی کمیشن کے حکام کا کہنا ہے کہ مسلح افراد نے پیر کے روز میکسیکو  سٹی کے قریب  سیاحتی   شہر کورنواکا کے ایسٹریلا ڈی اورو بس اسٹیشن  پر حملہ کیا ، جس میں پانچ افراد ہلاک اور ایک زخمی ہوگیا  ہے  ۔

 سیکیورٹی  حکام کا کہنا ہے مسلح افراد نے  شہر کے مرکز کے قریب واقع ایسٹریلا ڈی اورو بس اسٹیشن پر مخصوص افراد کو تلاش کے بعد ٹارگٹ کلنگ کا نشانہ بناتے ہوئے بس میں سوار تین، ایک شخص کو ویٹنگ ایریا اور ایک  شخص کو  باتھ روم میں فائرنگ  کرکے  قتل  کیا   ۔

حکام نے بتایا کہ ریاست مورلوس 5مختلف منشیات فروش تنظیموں کے مابین میدان جنگ بنا ہوا ہے۔

 دوسری جانب  صدر آندرس مینوئل لوپیز اوبریڈور کا  اتوار کو  قوم سے اپنے سالانہ خطاب میں  کہنا تھا کہ  میکسیکو  آج بھی “عدم تحفظ اور تشدد کا شکار  ہے  “۔

انہوں نے عوام  پر  زور دیتے ہوئے کہا کہ ہم سب  کو مل  کر ملک میں پھیلے  نام نہاد “ڈرگ وار”  اور  اس میں  شامل  لوگوں  کے  بہیمانہ تشدد کے خاتمے کے لئے کوششیں تیز کرنی  چاہئے ۔

واضح رہے کہ میکسیکو میں گزشتہ ہفتے کے آخر میں مختلف پرتشدد واقعات میں 15افراد کے قتل ہوچکے ہیں۔