پاکستان نے بھارت کی جانب سے دہشت گردی کے الزامات کو مسترد کر دیا ہے۔

تفصیلات کے مطابق ترجمان دفتر خارجہ زاہد حفیظ چوہدری نے اپنے ایک بیان میں کہا کہ پاکستان بھارتی وزارت خارجہ اور بھارتی  سیاسی راہنماوں کی جانب سے دہشت گردی کے الزامات کو سختی سے مسترد کرتا ہے۔

زاہد حفیظ چوہدری نے کہا کہ ایسے الزامات سے بھارت کی پاکستان کے خلاف ریاستی دہشت گردی کی حقیقت مٹ نہیں سکتی ایسے الزامات سے یہ حقیقت چھپائی نہیں جا سکتی کہ بھارت پاکستان کے خلاف عالمی سطح پر منظم پروپیگنڈہ کا ماسٹر مائنڈ ہے

ترجمان دفتر خارجہ کا کہنا تھا کہ پاکستان کی جانب سے عالمی برادری کو پیش کردہ ڈوزئیر اور یورپی یونین ڈس انفو لیب کی رپورٹ خود سب بیان کر رہی ہیں غلط بیانیہ پیش کرنے سے بی جے پی کی آر ایس ایس سے متاثرہ حکومت اپنی اندرونی ناکامیوں سے توجہ نہیں ہٹا سکتی نہ ہی اس طرح کے ہتھکنڈوں سے بھارت اپنے ہندوتواء ایجنڈے کے تحت عالمی برادری سے کشمیری عوام کے انسانی حقوق کی خلاف ورزیوں،اقلیتوں کے خلاف مظالم کو چھپا سکتا ہے۔

زاہد حفیظ چوہدری کا یہ بھی کہنا تھا کہ خطے مین دیرپا امن اور استحکام کے لیے بھارت دہشت گردی کو اپنی ریاستی پالیسی کے آلہ کے طور پر استعمال کرنا چھوڑ دے۔

ترجمان دفتر خارجہ زاہد حفیظ چوہدری کا مزید کہنا تھا کہ پاکستان کے خلاف اپنی عالمی مہم سازی بند کرے اورکشمیریوں کو اقوام متحدہ سلامتی کونسل قراردادوں کے مطابق اپنے حق استصواب رایے کے استعمال کا حق دے۔