چیئرمین ایف بی آر جناب شبر زیدی نے کسٹم آٹومیٹڈ سسٹم “برآمدات آسان سکیم” کا افتتاح کر دیا ہے۔

تفصیلات کے مطابق چیئرمین ایف بی آر جناب شبر زیدی کی زیر صدارت گزشتہ روز ایک اعلی سطحی اجلاس ایف بی آر ہاؤس میں منعقد ہوا۔

اجلاس کو بتایا گیا کہ مختلف مشکل اور متفرق ایکسپورٹ سکیموں کو آٹومیٹڈ سسٹم کے تحت کمپیوٹرائزڈ اور آسان بنا دیا گیا ہے، “برآمدات آسان” کے آٹومیٹڈ سسٹم میں سہولیات کی وجہ سے وقت میں بچت اور کاروبار کرنے میں آسانی ہو گی اور تاجروں اور کسٹم محکمے کے افسران کے درمیان رابطے میں بھی کمی آئے گی اور اس سے پاکستان میں کاروبار کرنے میں آسانی اور کاروباری لاگت کی ریٹنگ میں بھی بہتری آئے گی۔

چیئرمین ایف بی آر نے مزید ہدایات جاری کیں کہ موجودہ تمام سکیموں کو ضم کر کے ایک بڑی اور جامع سکیم بنائی جائے تاکہ برآمدکنندگان آسانی سے اس کو سمجھ سکیں، اس سے کم وقت میں بھرپور فائدہ اٹھا سکیں اور ان کے لئے کام کرنا مزید آسان ہو جائے۔

اجلاس کو بتایا گیا کہ موجودہ برآمدی سکیمیں مکمل طور پر کمپیوٹرائزڈ کر دی گئی ہیں اور برآمد کنندگان کو درخواست دینے سے لے کر اس کی منظوری اور بعد ازاں اشیاء کی درآمد اور چیزیں تیار کر کے برآمد کرنے تک دفتر آنے کی ضرورت نہیں ہے۔ چیئرمین ایف بی آر نے شرکاء کو ہدایات جاری کیں کہ ان سکیموں سے متعلق برآمدکنندگان کو زیادہ سے زیادہ آگاہی دی جائے تاکہ لوگ بھرپور طریقے سے اس کا فائدہ اٹھا سکیں۔

اجلاس میں میں چیئرمین کے علاوہ ممبر کسٹمز پالیسی جناب جاوید غنی، ممبر کسٹمز آپریشن جناب جواد اویس آغا،چیف کلکٹرز صاحبان اور دیگر سینئر عہدیداران نے شرکت کی۔