کراچی کے ضلع وسطی میں اسمارٹ لاک ڈاؤن  میں 13 جنوری 2021ء تک توسیع کردی گئی ہے۔

تفصیلات کے مطابق  کورونا وائرس پھیلنے کے خطرے کے پیش نظر ضلع وسطی کے مختلف علاقوں میں مائیکرو اور  اسمارٹ لاک ڈاؤن میں 13 جنوری 2021ء تک توسیع کردی گئی ہے۔

نوٹیفکیشن کے مطابق ضلع وسطی کے مخصوص علاقے مزید 14 روز کے  لیے سیل رکھنے کا فیصلہ کیا گیا ہے۔ ڈپٹی کمشنر ضلع وسطی نے نوٹیفکیشن جاری کر دیا ہے۔

نوٹیفکیشن میں کہا گیا ہے کہ ضلع وسطی کی 12 یونین کمیٹی مائیکرو اسمارٹ لاک ڈائون کے تحت بند کی جائیں گی جن میں عزیزآباد، علی آباد، کریم آباد، یاسین آباد کے علاقے بند رہیں گے۔

نوٹیفکیشن میں یہ بھی کہا گیا ہے کہ دستگیر، ناظم آباد، اصغر شاہ اسٹیڈیم، شادمان ٹائون کے علاقے سیل ہوں گے جبکہ نارتھ کراچی، مسلم ٹائون، فردوس کالونی بھی مائیکرو اسمارٹ لاک ڈائون کی زد میں آئیں گے۔

نوٹیفکیشن میں مزید کہا گیا ہے کہ ضلع وسطی کے 17 علاقوں میں مخصوص گھروں کو سیل کیا جائے گا جبکہ مائیکرو اسمارٹ لاک ڈائون 13 جنوری 2021ء تک نافذ رہے گا۔

نوٹیفکیشن کے مطابق کراچی ضلع وسطی میں مائیکرو اسمارٹ لاک ڈاؤن کے تحت ان علاقوں میں آنے اور جانے والے افراد پر لازمی ہو گا کہ وہ ماسک پہنیں جبکہ لوگوں کی نقل و حرکت کو سختی سے محدود رکھا جائےگا۔

نوٹیفکیشن میں کہا گیا ہے کہ پرچون کی دکانیں، میڈیکل اسٹور اور دیگر ضروری اشیا کی دکانیں محکمہ داخلہ کے گذشتہ نوٹیفکیشن کے مطابق مختص اوقات میں کھلنے کی اجازت ہو گی جبکہ ان علاقوں میں کسی قسم کی کھانے کی ہوم ڈلیوری یا باہر سے لانے کی اجازت نہیں ہوگی۔

‎ نوٹیفکیشن میں یہ بھی کہا گیا ہے کہ ان علاقوں میں آنے والے صنعتی اور تجارتی مراکز بند رہیں گے جبکہ ہر گھر کے ایک فرد کو کھانے پینے کی اشیا کی خریداری کرنے کی مشروط اجازت ہو گی اور اس کو اپنا شناختی کارڈ قانون نافذ کرنے والے اداروں کو دکھانا ہو گا۔

نوٹیفکیشن میں مزید کہا گیا ہے کہ گھروں میں کسی بھی قسم کی تقریبات کی اجازت نہیں ہوگی اور علاقہ مکینوں سے ملاقات کے لیے آنے والوں کو ٹھوس وجہ بتانا ہوگی جبکہ ان علاقوں میں آنے والے صنعتی اور تجارتی مراکز بند رہیں گے۔