کراچی کے رینجرز ہیڈ کوارٹرز میں ڈی جی رینجرز سندھ میجر جنرل عمر احمد بخاری کی زیر صدارت اجلاس ہوا۔

اجلاس میں کمشنر کراچی، پولیس، رینجرز اور حساس اداروں کے اعلیٰ افسران نے شرکت کی جبکہ محرم الحرام کے حوالے سے سیکورٹی پر بھی اہم فیصیلے کئے گئے ہیں۔

سندھ حکومت نے 9 اور10 محرم الحرام کی مناسبت سے 9 اور 10 ستمبر بروز پیر، منگل کو عام تعطیل کا اعلان کیا ہے جس کا باضابطہ نوٹی فکیشن بھی جاری کردیا گیا ہے۔

رینجرز کے اجلاس میں محرم کے جلوسوں کی سیکیورٹی کو یقینی بنانے کے لیے کیے جانے والے اقدامات کا تفصیلی جائزہ لیا گیا جبکہ فیصلہ کیا گیا ہے کہ رینجرز اور پولیس کی جانب سے یکم محرم الحرام سے جاری مشترکہ فلیگ مارچ اوراسنیپ چیکنگ کے عمل کو مزید مؤثر بنایا جائے گا۔

اجلاس میں فیصلہ کیا گیا ہے کہ تمام مکاتب فکر کے اجتماعات، مجالس،جلوسوں اور داخلی اور خارجی راستوں کی سیکیورٹی کو یقینی بنایا جائے گا اور کہا ہے کہ ضابطہ اخلاق کی خلاف ورزی کرنے والے عناصر کے خلاف سختی سے نمٹا جائے گا۔

اجلاس میں اس بات پر زُور دیا گیا کہ صوبائی حکومت کی طرف سے دیئے گئے احکامات کی روشنی میں مروجہ قوانین اور ضابطہ اخلاق کی مکمل پاسداری کو ہر ممکن طور پر یقینی بنایا جائے گا اور خلاف ورزی کرنے والے عناصر کے خلاف سختی سے نمٹا جائے گا۔

اجلاس میں تمام مکاتب فکر کے علماء کرام سے اپیل کی گئی کہ وہ محرم الحرام کے دوران صوبے بھر میں امن وامان قائم کرنے میں قانون نافذ کرنے والے اداروں سے بھر پور تعاون کریں۔

عوام سے اپیل کرتے ہوئے کہا گیا کہ وہ کسی بھی شرپسند عناصر، مشکوک سرگرمی اور نا خو ش گوار واقعہ کی فوری اطلاع تعینات رینجرز اہلکار، رینجرز ہیلپ لائن 1101، رینجرز مددگار واٹس ایپ نمبر03479001111 پر کال یا ایس ایم ایس کے ذریعے دیں۔

دوسری جانب امن وامان کی صورت حال کوبرقراررکھنے کے لیے 8 سے 10  محرم تک  ڈبل سواری پرپابندی عائد کی گئی ہے۔  خواتین، بچے، بزرگ، معذور افراد اور صحافی اس پابندی سے مستنیٰ ہوں گے جب کہ سکیورٹی کیلئے جلوسوں کی گزرگاہوں پر سی سی ٹی وی کیمرے نصب کیے جائیں گے۔