وفاقی کابینہ نے  انسانی جانوں کو بروقت اور ہنگامی بنیادوں پر بچانے کے لیے وفاقی وزارت صحت کو کورونا ویکسین کی خریداری کی منظوری دے دی۔

تفصیلات کے مطابق  وزیراعظم عمران خان کی زیر صدارت وفاقی کابینہ کا  اہم اجلاس ہوا۔

 کابینہ نے مچھ بلوچستان واقعہ میں شہید ہونے والے مزدوروں، اسلام آباد میں پولیس کی فائرنگ سے جاں بحق ہونے والے اسامہ ستی اور افواج پاکستان کے شہداء کے لیے دُعا ئےمغفرت ادا کی۔

معاون خصوصی برائے صحت ڈاکٹر فیصل سلطان نے کابینہ کو کورونا وبا ءکی حالیہ صور تحال پر بریفنگ دی۔

کابینہ نے پاکستان ایکسپوسینٹرز پرائیویٹ لمیٹڈ کے بورڈ آف ڈائریکٹر ز کے چیئرمین کی تعیناتی کی منظوری دی۔

کابینہ نے ٹریڈ آرگنائزیشنزایکٹ 2013کی شق نمبر21کے تحت اپیلوں پر فیصلہ دینے کے لیے ایک خصوصی کمیٹی قائم کرنے کی منظوری  بھی دی۔یہ کمیٹی صرف اُس وقت تک مجاذ ہوگی جب تک متعلقہ قانون میں ترامیم مکمل کرلی جائیں۔

کابینہ نے پریس کونسل آف پاکستان کے ممبرز تعینات کرنے کی منظوری  بھی دے دی۔

کابینہ نے ملک میں ماہی گیری کے شعبے سے برآمدات کے معیار کو بہتر کرنے کی خاطرانسپکشن کمیٹی قائم کرنے کی منظوری دی۔یہ کمیٹی ملک میں قائم ہونے والے فش پراسسنگ پلانٹس کی انسپکشن کے فرائض انجام دے گی۔

اس کمیٹی میں وزارت بحری امور، وزارت کامرس اور پاکستان فشریز ایکسپورٹرز ایسوسی ایشن کے نمائندے شامل ہیں۔

کابینہ نے ڈاکٹر رانا عبدالجبار کی بطور چیف ایگزیکٹو آفیسر، الٹرنیٹ انرجی ڈویلپمنٹ بورڈ استعفیٰ منظور کیااورنئے سی ای او کی تعیناتی کے  لیے سلیکشن کمیٹی قائم کرنے کی منظوری  بھی دی۔

نئی تعیناتی تک منیجنگ ڈائریکٹر پی پی آئی بی  اس ادارے کی نگرانی کریں گے۔

کابینہ نے کمیٹی برائے قانونی کیسز کے مورخہ 31دسمبر 2020ء کو منعقدہ اجلاس میں لیے گئے فیصلوں کی توثیق بھی کی۔