یوم دفاع و شہدا پر وزیراعلیٰ سندھ مراد علی شاہ نے راشد منہاس کو خراج عقیدت پیش کرتے ہوئے ان کے گھر کا رخ کیا اور اہل خانہ سے ملاقات کی۔

تٖصیلات کے مطابق وزیراعلیٰ سندھ سید مراد علی شاہ نے راشد منہاس کے گھر میڈیا سے گفتگو کرتے ہوئے کہا کہ آج ہم 54 واں یوم دفاع پاکستان منا رہے ہیں، پاک فضائیہ کے فلائنگ افسر شہید راشد منہاس کی قربانی ہمیشہ یاد رکھی جائے گی ۔

ترجمان وزیر اعلیٰ سندھ کے مطابق مراد علی شاہ نے راشد منہاس کے خاندان کے ساتھ ان کی شہادت پر تبادلہ خیال کیا اور شہید فلائنگ آفیسر کی یادگار تصاویرے بھی دیکھیں۔

وزیراعلیٰ سندھ مراد علی شاہ کا کہنا تھا  کہ آج میں نے راشد منہاس شہید کی والدہ اور خاندان سے ملاقات کی۔

مراد علی شاہ کا مزید کہنا تھا کہ جب تک مائیں ایسے جوان پیدا کرتی رہیں گی تب تک ملک کو کوئی نقصان نہیں پہنچا سکتا۔ انہوں نے کہا میں شہیدوں کی ماؤں کو سلام پیش کرتا ہوں۔

خیال رہے ملک بھر میں یوم دفاع یوم یکجہتی کشمیر کے طور پر منایا جا رہا ہے جس کا مقصد وطن عزیز کے لیے جانوں کا نذرانہ پیش کرنے والے شہدا کے ساتھ ساتھ بھارت مقبوضہ کشمیر میں مظلوم کشمیریوں کے ساتھ پاکستانی عوام کی حمایت کا اعادہ کرنا ہے۔

جبکہ آج صبح یوم دفاع کے موقع پر شہدا کو خراج عقیدت پیش کرنے کے لیے مرکزی تقریب سے خطاب کرتے ہوئے جنرل قمر جاوید باجوہ کا کہنا تھا کہ تھا کہ کشمیر تکمیل پاکستان کا نامکمل ایجنڈا ہے، کشمیر کے لیے آخری گولی، آخری سانس اور آخری سپاہی تک لڑنے کے لیے تیار ہیں۔

پاک فوج کے سربراہ نے کہا تھا کہ پاکستان کی بنیادوں میں شہیدوں کا خون شامل ہے، شہدا کی قربانیاں رائیگاں نہیں گئیں نہ ہی جائیں گی۔