پی پی پی چیئرمین نے بابائے قوم کو ان کی 71 ویں برسی پر شاندار الفاظ میں خراج عقیدت پیش کیا۔

پی پی پی چیئرمین بلاول بھٹو زرداری نے قائداعظم محمد علی جناح کی برسی کے موقعے پر پیغام دیتے ہوئے کہا کہ قائداعظم عظیم رہنما تھے، جو صدیوں میں پیدا ہوتے ہیں اور زمانے انہیں یاد رکھتے ہیں۔

بلاول بھٹو زرداری کا کہنا تھا کہ آج ہم قائداعظم کے فکر، ویژن اور سیاسی جدوجہد کی بدولت آزادی کی نعمت سے بہرمند ہیں۔

پی پی پی چیئرمین کا یہ بھی کہنا تھا کہ ہمارا عزم ہے، ہم بابائے قوم کے نظریات کی روشنی میں جمہوریت، دستور اورعوامی حقوق کی حفاظت کرے گے۔

اپنے پیغام میں بلاول بھٹو زرداری نے کہا کہ ہم ملک کو مساوات، ترقی پسند اور جمہوری ملک بنانے کی جدوجہد کو جاری رکھ کر قائداعظم کو خراج عقیدت پیش کرتے رہیں گے۔

پی پی پی چیئرمین بلاول بھٹو زرداری کا مزید کہنا تھا کہ قائد اعظم نے کشمیر کو پاکستان کی شہ رگ قرار دیا تھا، ہم کشمیری عوام کی جدوجہد کے بارآور ہونے تک چین سے نہیں بیٹھیں گے۔

واضح رہے بانی پاکستان قائداعظم محمدعلی جناح کا 71واں یوم وفات عقیدت واحترام سےمنایاجارہاہے۔

گورنرسندھ عمران اسماعیل اوروزیراعلیٰ سندھ مرادعلی شاہ سمیت مسلح افواج کی جانب سےمزارقائد پرحاضری دی گئی اوربابائے قوم کوسلامی پیش کی گئی۔

بابائے قوم کی 71ویں برسی پرتینوں مسلح افواج کی جانب سے مزار قائد پر سلامی دی گئی اور پھولوں کی چادر چڑھائی گئی۔گورنرسندھ اوروزیراعلیٰ نے بھی مزارقائدپرفاتحہ خوانی کی اور پھولوں کی چادر چڑھائی۔

دونوں رہنماؤں کی جانب سے قائداعظم کو خراج تحسین پیش کیاگیا اورکشمیری بھائیوں سے مکمل اظہاریکجہتی بھی کیاگیا۔