امتحانات آن لائن  لیے جائیں گے یا کلاسز میں، اس سے متعلق کوئی فیصلہ نہیں کیا جاسکا۔

تفصیلات کے مطابق چیئرمین ایچ ای سی کی زیر صدارت وفاقی جامعات کے وائس چانسلرز کا اجلاس بے نتیجہ ختم ہوگیا۔

ذرائع کا کہنا ہے کہ اجلاس میں وائس چانسلرز نے اپنی  اپنی آرا ءپیش کیں۔ آن لائن امتحانات کے معاملے پر وائس چانسلرز  آپس میں متفق  نہ ہوسکے۔

ذرائع کا مزید کہنا ہے کہ بعض یونیورسٹیز پہلے ہی آن لائن سسٹم کے تحت امتحانات لے چکی ہیں۔

کچھ وائس چانسلرز کا موقف  ہے کہ آن لائن امتحانات سے معیار تعلیم متاثر ہو رہا ہے۔ آن لائن امتحان سے طلبا کی تیاری کے اصل معیار کو پرکھنا مشکل ہے۔ جب یونیورسٹیز کھولنے کا فیصلہ ہو چکا ہے تو امتحانات آن لائن کیوں؟

بعض وائس چانسلرز آن لائن امتحان کے حق میں بولے کہ آن لائن کلاسز طلبا کے لیے ایک نیا تجربہ تھا ۔ مخصوص حالات کے باعث اس عرصے  کے لیے طلبا کو رعایت دینے میں کوئی حرج نہیں ہے۔

ذرائع کا کہنا ہے کہ سوالنامے کی تیاری کے حوالے سے بیشتر وائس چانسلرز نے وفاقی وزیر تعلیم کی رائے سے اتفاق کیا۔

ایچ ای سی حکام نے تمام وائس چانسلرز  کو متفقہ طور پر فیصلہ کرنے کی ہدایت کرتے ہوئے  کل دوبارہ اجلاس طلب کرلیا ۔

ذرائع کا کہنا ہے کہ کل اجلاس میں آن لائن امتحانات سے متعلق حتمی فیصلہ متوقع ہے۔