وفاقی وزیر برائے سائنس اور ٹیکنالوجی کا کہنا ہے کہ انتخابی اصلاحات میں واحد رکاوٹ اپوزیشن ہے۔

تفصیلات کے مطابق قومی اسمبلی میں وقفہ سوالات کے دوران وفاقی وزیر فواد چوہدری  کا کہنا تھا کہ  عمران خان نے انتخابات میں شفافیت لانے کا وعدہ پورا کردیا ہے،انتخابی اصلاحات میں واحد رکاوٹ اپوزیشن ہے۔

فواد چوہدری  کا کہنا تھا کہ اپوزیشن جتنا مرضی شور مچا لے عمران خان نے چوروں کو این آر او نہیں دینا، یہ اپنے ہمراہ اب ’چور چور ‘ کے پوسٹر بھی لے آئے ہیں لیکن قوم کو ان کی شکلوں سے ہی معلوم ہے کہ یہ سرٹیفائیڈ چور ہیں۔

انہوں نے مزید کہا کہ ’پاکستان ڈاکو موومنٹ‘ کے ارکان نے آئین پاکستان کی کتاب کو ڈیسک بجانے کے لیے استعمال کیا ہے،اس سے آئین کی توہین ہوتی ہے ۔

وفاقی وزیر نے کہا کہ  یہ صرف اپنے کیسز ختم کرنے اور این آر او کے  لیے احتجاج کر رہے ہیں لیکن عمران خان  نے ان کو نہیں چھوڑنا ہے۔

فواد چوہدری نے کہا کہ  چوروں کا سرغنہ لندن بیٹھا ہوا ہے اور 40 چور یہاں چھوڑ گیا ہے۔

ان کا کہنا تھا کہ  آئینی ترمیم کے حوالے سے مشاورت میں طے ہوا  تھا کہ اپوزیشن دو اور حکومت ایک تقریر کرے گی۔ لندن اور جاتی امرا سے ہدایات کے بعد ن لیگ والوں نے ایوان میں ترمیم پر احتجاج شروع کیا۔

وفاقی وزیر نے کہا کہ  اپوزیشن سے مذاکرات کا کوئی فائدہ نہیں ہے۔ یہ لوگ سینیٹ کو ملینیئر کلب بنائے رکھنا چاہتے ہیں۔

فواد چوہدری نے کہا کہ  پیپلز پارٹی بینظیر بھٹو کے نام پر ووٹ لیتی ہے اور ان کے خلاف کام کر رہی ہے۔یہ لوگ بینظیر بھٹو کے ساتھ  غداری کر رہے ہیں۔

انہوں نے مزید کہا کہ نواز شریف دنیا کے سب سے بڑے دہشتگر سے بھی دس ملین ڈالر لے کر کھا گئے۔ فضل الرحمان کے گھر اور دفتر لیبیا اور عراق کے پیسوں سے بنائے گئے۔