فلم دیکھنے کا شوق تقریباً ہر شخص کو ہی ہوتا ہے، اپنے فارغ اوقات میں لوگ اکثر فلمیں دیکھ کر لطف اندوز ہوتے ہیں۔

بعض اوقات کوئی عام سی اسٹوری پر مبنی سمجھی جانے والی فلم بھی سپر ہٹ ہوجاتی ہے۔ایسا ہی کچھ 1994 میں ریلیز ہونے والی فلم ’فورسٹ گمپ ‘کے ساتھ بھی ہوا۔

’فورسٹ گمپ ‘ نامی کامیڈی ڈراما فلم لوگوں کو اتنی بھائی تھی کہ اب تک اس کا جادو ختم نہیں ہوسکا اور یہ ہر دور کی بہترین فلموں میں سے ایک قرار دی جاتی ہے۔

رابرٹ زیمیکس  کی ہدایت کاری میں بننے والی اس فلم میں مرکزی کردار ٹام ہینکس نے ادا کیا تھا ۔ اس فلم کی   ٹیگ لائن ہی یہ ہے ،’زندگی بھر یاد رہنے والی کہانی‘۔

فلم کی  کہانی فوریسٹ گمپ نامی شخص کے گرد گھومتی ہے جو فلم کے آغاز پر ایک بس اسٹاپ پر سوٹ کیس کے ساتھ بیٹھا ہوتا ہے جہاں اس کی گفتگو ایک اجنبی سے ہوتی ہے اور وہ اپنے بچپن کی یادوں کو دہراتا ہے۔

فوریسٹ گمپ کچھ زیادہ ذہین تو نہیں ہوتا مگر حادثاتی طور پر متعدد تاریخی لمحات کو جنم دینے کا باعث بن جاتا ہے ۔ وہ فوج میں جاکر ویت نام کی جنگ کا حصہ بنتا ہے اور میڈلز جیتا ہے، صدر سے  بھی کئی بار ملتا ہے ۔

فوریسٹ گمپ اور بھی بہت کچھ کرتا ہے مگر اسے ہمیشہ صرف اپنی بچپن کی محبت کا خیال رہتا ہے جس کی ذاتی زندگی کچھ زیادہ اچھی نہیں ہوتی۔

مزید کہانی تو آؤ خود فلم دیکھ کر ہیں جانیں مگر یہ بات یقینی ہے کہ آپ اس کے ہر لمحے سے لطف اندوز ہوں گے کیونکہ اس کی کہانی کہیں بھی بور نہیں ہونے دیتی بلکہ نت نئے واقعات اس میں دلچسپی بڑھاتے رہتے ہیں۔

 یہی وجہ ہے کہ اسے بہترین فلم، ڈائریکٹر، اداکار، اڈاپٹڈ اسکرین، ویژول ایفیکٹس اور فلم ایڈیٹنگ کے آسکر ایوارڈز سے نوازا گیا تھا۔