سینیٹ الیکشن اوپن بیلٹ پر کرانے کے لیے  صدارتی ریفرنس پر سماعت  کل تک ملتوی کردی گئی۔

تفصیلات کے مطابق  چیف جسٹس  سپریم کورٹ کی سربراہی میں 5رکنی بینچ نے سینیٹ الیکشن اوپن بیلٹ پر کرانے سے متعلق صدارتی ریفرنس کی سماعت کی۔

سماعت کے موقع پر چیف الیکشن کمشنر اور ممبران عدالت میں پیش ہوئے۔

چیف جسٹس نے استفسار کیا کہ  ہم پہلے الیکشن کمیشن کا موقف سنیں گے جس پر چیف الیکشن کمشنر نے کہا کہ ہم نے تحریری جواب جمع کرا دیا ہے۔

چیف الیکشن کمشنر نے عدالت کو بتایا کہ انتخابی عمل میں بدعنوان سرگرمیوں کو روکنے کا طریقہ کار موجود ہے۔ انتخابی بدعنوانی سرگرمیوں کو روکنے کا الیکشن ایکٹ کے چیپٹر دس میں ذکر موجود ہے۔

انہوں نے مزیدکہا کہ  آئین کے آرٹیکل 2018 کی ذیلی شق تین شفاف انتخابات کرانے  کی ضامن ہے۔اگر انتخابات میں کسی بدعنوان سرگرمی کی اطلاع ملے تو اس کے خلاف کارروائی کا طریقہ کار بھی موجود ہے۔

چیف جسٹس نے مکالمے میں کہا کہ چیف الیکشن کمشنر صاحب آپ کیوں ہماری بات نہیں سمجھ رہے ،سینیٹ کے شفاف انتخابات  کے لیے کون سے اقدامات کیے گئے  ہیں وہ بتائیں ۔

چیف جسٹس نے کہا کہ  ہمیں آپ  کے کام کرنے کا طریقہ سمجھ نہیں آ رہا،جو قانون کہہ رہا ہے آپ نے وہ کرنا ہے۔

سپریم کورٹ نے الیکشن کمیشن کی رپورٹ غیرتسلی بخش قراردیتے ہوئے سینیٹ انتخابات سے متعلق صدارتی ریفرنس کے دوران الیکشن کمیشن سے شفاف انتخابات  کے لیے تجاویز طلب کرلیں۔

عدالت نے ریفرنس کی مزید سماعت  کل تک کے لیے ملتوی کردی۔