پاکستان مسلم لیگ ن کے رہنما شاہد خاقان عباسی نے کہا ہے کہ ‏جب تک اس ملک میں الیکشن کے دوران ووٹ چوری ہوتا رہے گا تب تک ملک نہیں چل سکتا ہے۔

تفصیلات کے مطابق میڈیا سے بات چیت کرتے ہوئے شاہد خاقان عباسی کا کہنا تھا کہ ڈسکہ میں بدقسمتی سے بدترین دھاندلی ہوئی ہے اورووٹ چوری کرنے کی کوشش کی گئی جبکہ صوبائی سیٹوں پر واضح اکثریت سے ن لیگ جیتی ہے ۔

شاہد خاقان نے کہا ہے کہ کل پاکستان میں ضمنی انتخابات ہوئے جس میں 20 پولنگ اسٹیشنوں کا رزلٹ نہیں آیا جو آر او آفس سے تقریباً 20 کلومیٹر دور تھے جبکہ 70 کلومیٹر دور پولنگ سٹیشنوں کا نتیجہ پہنچ آیا تھا۔

انہوں نے کہا ہے کہ عینی شاہدین کے مطابق 20 پولنگ اسٹیشنوں پر سویلین لوگ آئے اور پرائیوٹ گاڑیوں میں عملے کو لے گئے جس کے بعد ناصرف پولیس بلکہ انتظامیہ اور چیف سیکریٹری پنجاب بھی لاپتہ ہو گئے۔

انہوں نے مزید کہا کہ آج پورا پاکستان کہہ رہا ہے کہ ووٹ کو عزت دو لیکن اس طرح کے واقعات کے بعد ہم کب ووٹ کو عزت دیں گے۔

شاہد خاقان نے کہا ہے کہ یہ مقدمہ ہم پاکستان کے عوام کے سامنے رکھنا چاہتے ہیں کہ جب تک ووٹ چوری ہو گا اور آر او اغواء ہوں گے ملک نہیں چل سکتا ہے۔

انہوں نے کہا کہ بھونڈے طریقے سے الیکشن چوری کرنے کی کوشش کی گئی ہے اور پولیس خاموش تماشائی بنی کھڑی رہی۔

ان کا کہنا تھا کہ گزشتہ روز کے الیکشن کا 3 مارچ کو ہونے والے الیکشن سے  کھڑی ملتی ہے چونکہ سینیٹ الیکشن کیلیے قومی اسمبلی کی سیٹیں درکار ہوں گی اس لیے یہ سب کام کروایا جا رہا ہے۔