صوبائی وزیر صحت ڈاکٹر یاسمین راشد نے کہا ہے کہ پاکستان میں خواتین زندگی کے ہر شعبہ میں بہترین اور شاندار کردار ادا کر رہی ہیں۔

تفصیلات کے مطابق صوبائی وزیر صحت ڈاکٹر یاسمین راشد نے خواتین کے عالمی دن کے موقع پر اپنے ایک پیغام میں کہا کہ دین اسلام نے خواتین کی عزت و احترام کوواضح طور پر بیان کیا ہے۔

ڈاکٹر یاسمین راشد نے کہا کہ اللہ تعالیٰ نے ماں، بیٹی اور بہن جیسے عظیم رشتوں کا آئینہ بنا کر عورت کو مقام دیا ہے اور دین اسلام میں خواتین کو دیئے گئے حقوق کا مغربی دنیا تصور بھی نہیں کرسکتی۔

صوبائی وزیر صحت کا کہنا تھا کہ کوئی بھی معاشرہ خواتین کو عزت و احترام دیئے بغیر ترقی کی منازل طے نہیں کرسکتا، محکمہ صحت پنجاب میں خواتین فیکلٹی ممبران، ڈاکٹرز، نرسز اور لیڈی ہیلتھ ورکرز کے علاوہ دیگر شعبہ جات میں بطور کارکن بہترین فرائض سرانجام دے رہی ہیں۔

ڈاکٹر یاسمین راشد کا یہ بھی کہنا تھا کہ ملازمت پیشہ خواتین کیلئے آسانیاں پیدا کرنے کیلئے صوبہ بھر میں ڈے کیئر سینٹرز قائم کئے جا رہے ہیں جبکہ ماں اور بچہ کی صحت کو یقینی بنانے کیلئے صوبہ کے پانچ اضلاع اٹک، راجن پور، بہاولپور، سیالکوٹ اور لیہ میں 28ارب روپے کی لاگت سے نئے مدر اینڈ چائلڈ اسپتال بنائے جا رہے ہیں۔

صوبائی وزیر صحت ڈاکٹر یاسمین راشد کا مزید کہنا تھا کہ وزیراعظم عمران خان نے اقتدار سنبھالتے ہی ملکی ترقی میں خواتین کی اہمیت پر زور دیا تھا، بحیثیت خاتون وزیراعظم عمران خان اور وزیراعلیٰ پنجاب سردار عثمان بزدار کے ویژن کے مطابق میں پنجاب کی عوام کو صحت کے شعبہ میں بہتر سہولیات فراہم کرنے کی کوشش کر رہی ہوں۔