حکومت پاکستان نے وزارت خارجہ میں شاہ محمود قریشی کی زیر صدارت مشاورتی کونسل برائے امور خارجہ کا نواں اجلاس ہوا۔

اجلاس میں سیکرٹری خارجہ سہیل محمود، سابقہ خارجہ سیکریٹریز ، ماہرین بین الاقوامی تعلقات سمیت وزارت خارجہ کے سینیر حکام نے شرکت کی۔

وزیر خارجہ نے شرکاء کو اپنے حالیہ دورہ ء جنیوا اور اس دوران ہونیوالے اعلیٰ سطحی روابط کی تفصیلات سے آگاہ کیا

 مخدوم شاہ محمود قریشی نے اجلاس سے خطاب کرتے ہوئے کہا کہ مقبوضہ جموں و کشمیر کے حوالے سے جاری مشترکہ بیان میں اٹھاون ممالک کی واضح حمایت کا سامنے آنا پاکستان کے لیے اور باالخصوص نہتے کشمیریوں کیلئے بہت اہمیت کی حامل ہے

 مخدوم شاہ محمود قریشی کا کہنا تھا کہ مقبوضہ جموں و کشمیر کے لاکھوں معصوم انسان گذشتہ تینتالیس روز سے بدترین کرفیو کا سامنا کر رہے ہیں۔

 مخدوم شاہ محمود قریشی کا یہ بھی کہنا تھا کہ بھارتی سپریم کورٹ کے فیصلے سے پاکستان کے موقف کی توثیق ہوئی، اپوزیشن رہنما غلام نبی آزاد کو مقبوضہ جموں و کشمیر کے کرفیو زدہ علاقوں کے دورے کی اجازت کے حوالے سے بھارتی سپریم کورٹ کا فیصلہ خوش آئند ہے۔

اجلاس میں رواں ماہ کے آخری عشرے میں منعقد ہونے والے اقوام متحدہ جنرل اسمبلی کے اجلاس میں مقبوضہ جموں و کشمیر کی صورتحال کو عالمی سطح پر موثر انداز میں اجاگر کرنے کے حوالے سے خصوصی مشاورت کی گئی اور مقبوضہ جموں و کشمیر کے نہتے معصوم انسانوں کو بھارتی استبداد سے نجات دلانے کے لیے بین الاقوامی برادری کے ساتھ سفارتی روابط کو مزید فروغ دینے پر بھی اتفاق کیا گیا ۔

واضح رہے اس سے قبل وزیر خارجہ شاہ محمود قریشی نےبھارتی سپریم کورٹ کے فیصلے کو خوش آئند قرار دیتے ہوئے کہا تھا کہ بھارتی عدالت بھی مودی حکومت کے اقدام سےخائف ہے

وزیرخارجہ نے یہ بھی کہا تھا کہ بھارتی سپریم کورٹ کا فیصلہ بہت بڑی کامیابی ہے،بھارتی سپریم کورٹ کےفیصلے سےکشمیریوں کا حوصلہ مزید بلند ہوگا۔