ٹک ٹاک اسٹار نے رشتے کے انکار ہونے کی وجہ سے خودکُشی کرلی۔

تفصیلات کے مطابق 20 سالہ ٹک ٹاکر شہزاد احمد کا پشاور کی تحصیل تہکال سے تعلق تھا۔

ٹک ٹاکر شہزاد احمد کے بھائی سجاد نے  پولیس کو اس کے لاپتا ہونے کی رپورٹ درج کروائی تھی۔

مقامی پولیس کے مطابق بعدازاں سجاد نے اطلاع دی کہ دوسرے کمرے میں شہزاد نے خود کو چھت کے پنکھے کے ساتھ لٹکا لیا۔

تاہم سجاد اپنے بھائی کو اسپتال لے کر پہنچا  وہاں اسے مردہ قرار دے دیا گیا۔

اس حوالے سے ٹک ٹاکر کے بھائی کا کہنا ہے کہ وہ ایک لڑکی سے شادی کرنا چاہتا تھا لیکن لڑکی کے والد نے رشتے سے انکار کردیا تھا جس کی وجہ سے وہ شدید مایوسی  اور ذہنی دباؤ کا شکار تھا۔

جبکہ شہزاد کے ایک دوست عامر نے بتایا کہ وہ ایک ٹک ٹاک اسٹار تھا اور ویڈیو شیئرینگ ایپ پر اس کے 3 لاکھ سے زائد فالوور ز تھے۔

دو سال قبل اسے اپنی ایک فین سے محبت ہوگئی تھی تاہم لڑکی کی عمر اس وقت محض 16 برس تھی اور اسی بنیاد پر لڑکی کے گھر والوں نے  رشتے سے انکار کردیا تھا۔

ٹک ٹاک اسٹار کے دوست نے بتایا کہ لڑکی نے اس کے بعد شہزاد سے دوبارہ نہ ملنے کا کہا تھا جس پر شہزاد نے 50 نیند کی گولیاں کھا کر خود کُشی کرنے کی کوشش کی تھی مگر اس کی جان بچ گئی تھی۔

تاہم اس واقعے کے بعد شہزاد کا اس لڑکی سے دوبارہ رابطہ ہوگیا۔

عامر کا کہنا ہے کہ کچھ عرصہ قبل دوبارہ اُسی لڑکی کو شادی کا پیغام بھیجا اور اس بار پھر انکار ہوگیا۔

 لڑکی کے گھر والوں نے یہ اعتراض بھی کیا تھا کہ شہزاد اپنا سارا وقت ٹک ٹاک پر گزارتا ہے۔

واضح رہے کہ شہزاد نے اس اعتراض پر اپنے تین لاکھ فالوورز والا اکاؤنٹ بھی ڈیلیٹ کردیا تھا لیکن اس کے باوجود لڑکی کے گھر والے رشتے کے لیے نہیں مانے۔