این اے 249 کے ضمنی انتخابات میں امجد آفریدی کو ٹکٹ دینے پر پی ٹی آئی رکن سندھ اسمبلی ملک شہزاد اعوان نے استعفیٰ دینے کا اعلان کردیا۔

تفصیلات کے مطابق این اے 249 کے ضمنی انتخابات میں امجد آفریدی کو ٹکٹ دینے پر پی ٹی آئی میں شدید اختلافات سامنے آئے ہیں، پی ٹی آئی رکن سندھ اسمبلی ملک شہزاد اعوان نے گورنر سندھ عمران اسماعیل اور اپوزیشن لیڈر حلیم عادل شیخ کو استعفیٰ بھیج دیا۔

اپنے ایک بیان میں پی ایس 116 سے تحریک انصاف کے رکن سندھ اسمبلی ملک شہزاد اعوان نے امجد آفریدی کو پارٹی ٹکٹ دینے پراستعفی دینے کا اعلان کرتے ہوئے کہا کہ پارلیمانی بورڈ نے نامناسب امیدوار کو این اے 249 کا ٹکٹ دیا، جو شخص یوسی اور صوبائی اسمبلی کا الیکشن ہار چکا ہے اس کو کس بنیاد پر ٹکٹ دیا گیا۔

تحریک انصاف کے رکن سندھ اسمبلی نے کہا کہ وزیراعظم عمران خان اور پارلیمانی بورڈ کو اس ضمن میں خط لکھ چکا ہوں، پاکستان تحریک انصاف کا امیدوار بہت کمزور امیدوار ہے، پورے ملک کی نظریں اس وقت این اے 249 پر ہیں۔

ملک شہزاد اعوان نے یہ بھی کہا کہ بلدیہ ٹاؤن میرا گھر ہے، اپنے گھر سے ہی اپنی جماعت کا جنازہ نکلتے نہیں دیکھ سکتا، ہمیں یہ سیٹ ہر حال میں جیت کر وزیراعظم کو تحفے میں دینی ہے۔

تحریک انصاف کے رکن سندھ اسمبلی کا کہنا تھا کہ ہم پر مسلط کیے گئے امیدوار کی تاریخ دیکھیں تو لیڈر شپ کو میرے مؤقف کی سمجھ آجائے گی۔

ملک شہزاد اعوان کا یہ بھی کہنا تھا کہ امجد آفریدی نے پہلے اپنی یوسی سے الیکشن لڑا وہ ہار گیا پھر اپنے پی ایس سے الیکشن لڑا وہ ہار گیا، اب کی بار ہارنے کے لیے امجد آفریدی نے میرے حلقے این اے 249 کا انتخاب کیا ہے، جو ہمیں کسی صورت قبول نہیں۔

تحریک انصاف کے رکن سندھ اسمبلی ملک شہزاد اعوان کا مزید کہنا تھا کہ امیدوار کے کمزور ہونے کی وجہ سے میں اپنی سندھ اسمبلی کی رکنیت سے استعفیٰ دینے کا اعلان کرتا ہوں۔