صدر مملکت ڈاکٹر عارف علوی نے کہا ہے کہ پاکستان پورے خطے میں امن و سلامتی چاہتا ہے  اور ترقی کا خواہش مند بھی ہے۔

صدر مملکت ڈاکٹر عارف علوی نے کہا ہے کہ پاکستان کے دوست ممالک ترقی اور خوشحالی میں ہمیشہ ہمارے ساتھ ہیں اور ہمیں زندہ قوم ہونے کا ثبوت دیتے ہوئے آگے بڑھنا ہے۔

صدر مملکت نے کہا کہ پاکستان دفاعی صلاحیت میں خودمختاری حاصل کرچکا ہے، افواج پاکستان نے ہر مشکل میں وطن عزیز کی حفاظت کی اور پاک فوج نے آپریشن ردالفساد میں دہشتگردی کے نیٹ ورک کو نیست و نابود کیا۔

ڈاکٹر عارف علوی نے کہا ہے کہ قرارداد پاکستان 23 مارچ کے دن پیش کی گئی تھی جس کے بعد علامہ اقبال، قائداعظم کی جدوجہد سے 7 سال میں خواب شرمندہ تعبیر ہوا تھا۔

صدر مملکت کا کہنا تھا کہ جنوبی ایشیا میں پائیدار امن کا قیام مقبوضہ کشمیر کےمنصفانہ حل سے مشروط ہے کیونکہ 5 اگست کا اقدام اقوام متحدہ کی قرار دادوں کی کھلی خلاف ورزی ہے۔

ڈاکٹر عارف علوی نے کہا ہے کہ پاکستان دنیا کے ہر فورم پر کشمیریوں کیلئے آواز بلند کررہا ہے اور کرتا رہے گا، بلاشبہ کشمیر ہماری شہ رگ ہے۔

انہوں نے مزید کہا ہے کہ دنیا کو کورونا وباء کا سامنا ہے اور پاکستان نے کم وسائل کے باوجود کورونا وباء کا سامنا کیا، بہت جلد کورونا وباء پر قابو پالیں گے لیکن احتیاط لازم ہے۔

خیال رہے کہ ان خیالات کا اظہار صدر پاکستان ڈاکٹر عارف علوی نے یوم پاکستان  پریڈ سے خطاب کے دوران کیا ہے۔