کورونا وائرس کے پیش نظر ضلع وسطی کی چار سب ڈیوژنز کے مختلف علاقوں میں مائیکرو اسمارٹ لاک ڈاؤن کا فیصلہ کرلیا جس کا نوٹیفیکشن بھی جاری کر دیا گیا ہے۔

محکمہ داخلہ کی جانب سے جاری نوٹیفیکشن کے مطابق لاک ڈاؤن کا نفاذ 25 مارچ سے 8 اپریل  تک ہوگا۔

نوٹیفیکشن میں کہا گیا ہے کہ مائیکرو اسمارٹ لاک ڈاؤن ضلع وسطی کے ڈیوژنز نارتھ کراچی، نارتھ ناظم آباد، گلبرگ اور لیاقت آباد کی 5 یوسیز کے علاقوں اور رہائشی یونٹس پر لگایا گیا ہے جبکہ مائیکرو اسمارٹ لاک ڈاؤن ڈسٹرکٹ ہیلتھ آفیسر کی جانب سے ہاٹ اسپاٹ کی نشاندہی پر کیا گیا ہے۔

نوٹیفیکشن میں یہ بھی کہا گیا ہے کہ دس یونین کاؤنسل میں بائیس کورونا کے متاثرہ مریض موجود ہیں، کورونا کے متاثرہ مریضوں کے گھروں کی صرف گلیوں میں لاک ڈاؤن ہوگا۔

نوٹیفیکشن کے مطابق متاثرہ علاقوں میں آنے اور جانے والے تمام افراد کو ماسک پہننا لازمی قرار جبکہ متاثرہ علاقوں کے لوگ کی غیر ضروری نقل و حرکت پر پابندی ہوگی۔

نوٹیفکیشن میں کہا گیا ہے کہ علاقے میں تمام کاروباری اور صنعتی سرگرمیاں معطل رہیں گی جبکہ متاثرہ علاقوں میں ڈبل سواری پر پابندی ہوگی۔

نوٹیفکیشن میں یہ بھی کہا گیا ہے کہ متاثرہ علاقوں میں فیملی اجتماع پر پابندی ہوگی جبکہ متاثرہ علاقوں کے کورونا مثبت افراد اپنے گھروں میں قرنطینہ رہیں گے۔

محکمہ داخلہ کی جانب سے جاری نوٹیفیکشن میں مزید کہا گیا ہے کہ حکومت متاثرہ علاقوں میں بسنے والے مستحق افراد میں راشن تقسیم کرنے کے ہر ممکن اقدامات کرے گی۔