میئر کراچی وسیم اختر نے دبئی میں سابق صدرپرویزمشرف اور سابق گورنر سندھ عشرت العباد سے ملاقات کی، ملاقات میں کراچی کی صورتحال پر بات چیت ہوئی۔

وسیم اخترنےکراچی سمیت پورے صوبے کے حالات اور صورتحال سے پرویز مشرف کو آگاہ کرتے ہوئے کہا کہ کراچی کو تباہ کردیا گیا ہے،کراچی کو کوئی اپنی ذمہ داری سمجھنے والا نہیں، شہر کو لاوارث کر دیا گیا ہے۔

سابق صدر پرویز مشرف نے کراچی کی صورتحال پر بات کرتے ہوئےکہا کہ میئرکوبا اختیارہونا چاہیے، کراچی کو بہتر بنانے کے لیے میرے دور میں جو میئر کے پاس اختیارات تھے وہی اب بھی ملنے چائیے۔

وسیم اخترسے ملاقات میں عشرت العباد نے  بھی کراچی کے مسائل کے حل کے لیے وسیم اختر کو مکمل تعاون کی یقین دہانی کرائی اور اس سلسلے میں تجاویز بھی پیش کیں۔

سابق گورنر نے کہا کہ وفاق کراچی کے منصوبوں کیلئے فنڈز کی فراہمی میں کردار ادا کرے ، میئر کراچی بولے، مسائل کے عارضی حل کے بجائے مستقل بنیادوں پرحل تلاش کرنا ہوگا۔

اس سے قبل کراچی میئر وسیم اختر نے کلفٹن میں واقع ارب فاریسٹ پارک دورے میں میڈیا سے گفتگو کرتے ہوئے کہا تھا کہ ٹیکس کا پیسہ کراچی میں خرچ نہیں ہوتا ،کراچی شہر پورے ملک کو چلاتا ہے،بھیک نہیں مانگ رہا،کراچی کو فنڈز چاہئیے۔

کراچی میئرکا یہ بھی کہنا تھا کہ میں نے ہر ضلع میں پارکس بنائے ہیں، اس شہر کو پیسے واپس چاہئے، اس سے قبل کراچی سےکچرا اٹھتا تھا۔

میڈیا سے گفتگو کرتے ہوئے وسیم اخترنے کہا تھا کہ سڑکوں کا حال دیکھ لیں، ہم سب کو مل کرکراچی کے مسائل کو حل کرناہوگا۔