اسپیکر قومی اسمبلی اسد قیصر نے کہا ہے کہ پارلیمان کے تکریم اور تقدس کو قائم رکھنا ہم سب کی مشترکہ ذمہ داری ہے۔

تفصیلات کے مطابق سینٹ میں قائد حزب اختلاف سید یوسف رضا گیلانی اور اسپیکر قومی اسمبلی اسد قیصر کے مابین ٹیلیفونک رابطہ ہوا جس میں ایوان کا ماحول بہتر بنانے اور انتخابی اصلاحات پر تبادلہ خیال کیا گیا۔

اسپیکر قومی اسمبلی نے کہا کہ انتخابی اصلاحات وقت کی عین ضرورت ہیں، حزب اختلاف جلد پارلیمانی کمیٹی کے لیے نام دیں تاکہ اصلاحات پر کام شروع کیا جا سکے۔

اسد قیصر نے یہ بھی کہا کہ پارلیمان کی تکریم اور تقدس کو قائم رکھنا ہم سب کی مشترکہ ذمہ داری ہے، ملک کو درپیش چیلنجز کا مقابلہ پارٹی سیاست سے بالاتر ہو کر کیا جا سکتا ہے۔

اسپیکر قومی اسمبلی اسد قیصر نے مزید کہا کہ قانون سازی کے لیے حکومت اور اپوزیشن کو کردار ادا کرنا ہوگا۔

سید یوسف رضا گیلانی نے کہا کہ ایوان کی کارروائی احسن انداز میں چلانے کے لیے تعاون کیا جائے گا اور اس ضمن میں چیئرمین بلاول بھٹو زرداری نے سید نوید قمر کو فوکل پرسن مقرر کیا ہے۔

سید یوسف رضا گیلانی نے مزید کہا کہ پاکستان پیپلز پارٹی پارلیمانی سیاست پر یقین رکھتی ہے جبکہ انتخابی اصلاحات عصر حاضر کا اہم تقاضہ ہے اور پاکستان پیپلز پارٹی انتخابی اصلاحات کے لیے اپنا مثبت کردار ادا کرے گی۔