لاہور کے علاقے نشتر کالونی میں تہرے قتل کی لرزہ خیز واردات ہوئی ہے، گھریلو جھگڑے پر فائرنگ سے تین افراد جاں بحق ہو گئے۔

تفصیلات کے مطابق نشتر کالونی کے علاقے میں گھریلو جھگڑے کے دوران ملزم محمد علی نے فائرنگ کر کے والدہ گلشن، بھائی حماد احمد اور بھابھی لبنیٰ حماد کو قتل کر دیا۔

پولیس کے مطابق واقعہ کی اطلاع ملتے ہی پولیس اور فرانزک ٹیمیں فوری طور پر موقع پر پہنچیں، پولیس نے لاشیں تحویل میں لے کر پوسٹ مارٹم کے لیے ڈیڈ ہاؤس منتقل کر دی ہیں۔

پولیس کا کہنا تھا کہ واردات کے بعد ملزم موقعہ سے فرار ہو گیا، ابتدائی معلومات کے مطابق قتل کی وجہ گھریلو جائیداد کا تنازعہ ہے۔

پولیس کا مزید کہنا تھا کہ جائے واردات سے شواہد اکٹھے کر کے ملزم کی گرفتاری کے لیے ٹیمیں تشکیل دے دی گئی ہیں۔

واضح رہے اسسے قبل خیبر پختونخوا کے ضلع بنوں میں بھی بھائیوں کے مابین فائرنگ کا واقعہ پیش آیا تھا۔ فائرنگ سے ایک خاتون سمیت دو افراد جاں بحق جبکہ ایک دو افراد زخمی ہوگئے تھے۔

بنوں پولیس کے مطابق دونوں بھائیوں کی تلخ کلامی ہاتھا پائی سے فائرنگ کے تبادلے تک جا پہنچی ،جاں بحق ہونے والوں میں باپ  بہادر زمان، بیٹا بلال اور بیٹی سائرہ شامل ہے جبکہ زخمی ہونے والوں میں بھی  مقتول بہادر زمان کی ایک بیٹی اور بیٹا شامل ہے۔