وفاقی حکومت نے تحریک لبیک پاکستان(ٹی ایل پی) پر پابندی لگانے کا فیصلہ کرلیا۔

اسلام آباد میں پریس کانفرنس کرتے ہوئے وفاقی وزیر داخلہ شیخ رشید احمد نے کہا کہ ٹی ایل پر پابندی لگانے کا فیصلہ کیا ہے۔

وزیرداخلہ  کا کہنا ہے کہ  تحریک لبیک پر پابندی لگانے کا فیصلہ پنجاب حکومت کی درخواست پر اینٹی ٹیرارزم ایکٹ کے تحت  کیا گیا ہے۔

شیخ رشید نے کہا کہ میں خود ختم نبوت ﷺ کا سپاہی ہوں، جس ملک میں ختم نبوت کا سپاہی  وزیرداخلہ خود ہو وہاں ناموس رسالت ﷺ پر کوئی سمجھوتا نہیں ہوسکتا۔ ختم نبوت ﷺ اور ناموس رسالت ﷺ کے لیے شیخ رشید کی جان بھی حاضر ہے۔

انہوں نے مزید کہا کہ  مظاہرین نے سڑکوں کو بلاک کیا ،ایمبولینسز کو روکا، 2 پولیس اہلکار شہید کیے۔ہم نےآخر تک مذاکرات کی کوشش کی لیکن یہ ہر صورت فیض آباد آنا چاہتے تھے، پولیس اور قانون نافذ کرنے والے اداروں نے اہم کردار ادا کیا۔

وفاقی وزیر داخلہ نے کہا کہ جی ٹی روڈ اور ہائی ویز  سمیت  ملک میں تمام شاہراہیں کھول دی گئی ہیں۔

شیخ رشید نے کہا کہ  تحریک لبیک پر پابندی  کے لیے سمری کابینہ میں بھجوائی جارہی ہے۔

ان کا کہنا تھا کہ  ہم آج بھی اس بات پر قائم ہیں کہ اسمبلی میں ناموس رسالت ﷺ کا بل پیش کریں گے۔ ہم ایسا مسودہ چاہتے ہیں جس سے نبی ﷺ کا جھنڈابلند ہو۔ جو آپ چاہتے ہیں اس سے دنیا میں ہمارا انتہاپسندی کا امیج جائے گا۔