یمن میں سعودی اتحاد کے  مسجد پر فضائی حملےمیں 5 شہری ہلاک ہوگئے۔

غیر ملکی خبر رساں ادارے کے مطابق حوثی قبائل کے زیر انتظام چلنے والے نشریاتی ادارے کا کہنا ہےکہ یمن میں سعودی اتحادی افواج نےمسجد پر فضائی حملہ کیاجس میں 5 افراد جاں بحق  ہوگئے۔

فضائی حملے میں جاں بحق ہونے والے پانچوں شہریوں کا تعلق ایک ہی خاندان سے تھا ۔جبکہ 2 بچے بھی لاپتہ ہوگئے ہیں جن کی تلاش کا کام جاری ہے۔

سعودی عرب  کی جانب سے حملوں کی ابھی تک تصدیق نہیں  کی گئی ہے۔

واضح رہے کہ رواں ماہ کے آغاز میں یمن کے ایک حراستی مرکز پر سعودی اتحادی کی بمباری سے کم از کم 100 افراد ہلاک ہو گئے تھے۔

عالمی امدادی ادارے انٹرنیشنل کمیٹی آف ریڈ کراس کے مطابق وہ اس حراستی مرکز میں رکھے گئے افراد سے پہلے ملاقات کر چکے تھے۔

یمن میں سنہ 2015 سے جنگ جاری ہے، یہ تنازعہ اس وقت شروع ہوا تھا جب حوثی قبائل نے دارالحکومت صنعا کا کنٹرول سنبھال کر حکومت کا تختہ الٹ دیا تھا۔

یمن میں سعودی عرب کی قیادت میں تقریباً  ہر  روز فضائی حملے کیے جاتے ہیں جبکہ حوثی قبائل  اکثر سعودی عرب پر میزائل حملے کرتے ہیں۔

اقوام متحدہ کے اعداد و شمار کے مطابق یمن میں سنہ 2016 سے جاری اس جنگ کے نتیجے میں اب تک تقریبا 70 ہزار لوگ ہلاک ہو چکے ہیں۔