مشہور زمانہ امریکی ٹی وی سیریز گیم آف تھرونز میں ڈریگن کی ماں کے طاقتور کردار سے دنیا بھر میں شہرت پانے والی برطانوی اداکارہ ایمیلیا کلارک نے دُنیا بھر کی تمام ماؤں کو ’سُپر ہیرو‘ قرار دے دیا ہے۔

اداکارہ ایمیلیا کلارک کا کہنا ہے کہ’ہم ہمیشہ ماؤں کو سُپر ہیروز کہتے ہیں اور میں سوچتی ہوں کہ اگر وہ واقعی ہوتیں تو کیا ہوتا؟ اگر وہ قانونی طور پر سُپر ہیروز ہوتیں تو؟‘

گیم آف تھرونز کے شائقین ڈریگن کی ماں کو تو اچھی طرح جانتے ہیں لیکن  جو وہ نہیں جانتے وہ یہ ہے کہ ڈریگن کی ماں یعنی اداکارہ ایمیلیا کلارک حقیقت میں خود کو مدر آف میڈنیس سمجھتی ہیں کیونکہ اداکارہ نے سپر ہیرو موم کے اسی خیال کے ساتھ ایک مزاحیہ کتاب’ ایم اوایم : مدر آف میڈنیس‘ لکھی ہے۔

ایمیلیا کلارک نے ایک انٹرویو میں کتاب لکھنے کے خیال کے بارے میں بتاتے ہوئے کہا کہ ’تین سال پہلے میں اپنے کچھ دوستوں کے ساتھ کار میں سفر کر رہی تھی جب مجھے اس بارے میں خیال آیا جوکہ بہت ہی مضحکہ خیز تھا۔‘

اداکارہ نے بتایا کہ ’اس کے بعد جب میں رات گزرنے کے بعد صبح اٹھی تو میں نے سوچا کہ یہ مضحکہ خیز خیال تو ہے لیکن مجھے اس پر عمل کرنا چاہیے۔‘

ایمیلیا کلارک کی کتاب ایک چھوٹی سیریز ہے جو تین شماروں پر مشتمل ہے۔

انہوں نے مصنف مارگوریٹ بینیٹ کے ساتھ مل کر یہ کتاب لکھی ہے۔

مزاحیہ کتاب میں مایا نامی ایک ماں کی کہانی ہے جوکہ بہت طاقتور خاتون ہے اور وہ اپنی سُپر پاورز کا استعمال انسانی اسمگلروں کے خلاف کرتی ہے۔

اس سے قبل ایمیلیا نے انکشاف کیا تھا کہ ان کو دو بار دماغ میں اینیورزم (شریان یا رگ کا پھول جانا) ہوئے جس کے لیے انہیں سرجری کی ضرورت پڑی۔

ان کا کہنا تھا کہ دماغ میں خون بہہ جانے سے وہ انتہائی نگہداشت وارڈ تک پہنچ گئیں جس کے بعد ان کو اپنا نام تک یاد نہیں تھا۔

ایمیلیا کلارک نے کہا کہ انہوں نے پہلے اینیورزم کے بعد فوری طور پر ’گیم آف تھرونز‘ میں کسی شخص کو نہیں بتایا۔

انہوں نے کہا کہ میں تب بھی اور اس کے بعد بھی کسی بھی وجہ سے کام سے نکال دیے جانے سے ڈرتی تھی۔