وفاقی وزیر اطلاعات فواد چوہدری نے کہا ہے کہ اس بار عید پر 5 چھٹیاں دی جارہی ہیں۔

تفصیلات کے مطابق وزیر اطلاعات فواد چوہدری نے کابینہ اجلاس کے بعد میڈیا سے گفتگو کرتے ہوئے کہا کہ عید الفطر کی 5 چھٹیاں زیر غور ہیں، کوشش یہی ہے کہ مکمل لاک ڈاؤن کی طرف نہ جانا پڑے۔

فواد چوہدری نے کہا کہ چین اور ایران سے آکسیجن مل سکتی ہے، بدقسمتی سے ایران میں بھی کورونا کے باعث حالات بہت خراب ہیں لیکن وقت پڑنے پر ہمیں ایران سے آکسیجن مل جائے گی۔

وزیر اطلاعات کا کہنا تھا کہ ایک سال میں7ہزار بیڈز کا اضافہ کیا، ایک سال میں آکسیجن کی مقدار کو ڈبل کیا اور اس وقت192 میٹرک ٹن آکسیجن روزانہ بنارہے ہیں ، اگر مزید ضرورت پڑی تو انڈسٹری کی آکسیجن بھی ہیلتھ سیکٹر کودے دیں گے۔

فواد چوہدری کا یہ بھی کہنا تھا کہ آکسیجن کا بحران درپیش نہیں ہے،308میٹرک ٹن آکسیجن کااضافہ کیا ہے جبکہ ہیلتھ سیکٹر میں بھی 500 میٹرک ٹن آکسیجن دی جارہی ہے جو تشویشناک مریضوں کیلئےکافی ہے

وزیر اطلاعات نے کہا کہ اقدامات نہ کرتے تو ہمارا حال بھی بھارت جیسا ہوتا، ہر کام ڈنڈے کے زور پر نہیں ہوسکتا،عوام خود بھی احتیاط کریں۔

فواد چوہدری نے یہ بھی کہا کہ اپوزیشن انتخابی اصلاحات پر آئے اور ہمارے ساتھ بیٹھے لیکن اپوزیشن اصلاحات میں حکومت کے ساتھ مشاورت کیلئے تیار نہیں لگ رہی۔

وفاقی وزیر اطلاعات چوہدری فواد حسین نے مزید کہا کہ حکومت اپنی تجاویز دے چکی اب اپوزیشن بھی اپنی تجاویز دے۔ الیکٹرونک ووٹنگ مشینوں کی تیاری کاعمل جاری ہے، اگلا الیکشن الیکٹرونک ووٹنگ کی بنیاد پر ہوگا۔