ہنزہ سے تعلق رکھنے والے کوہ پیما سرباز خان نیپال میں مناسلو چوٹی سر کر لی۔ مناسلو دنیا کی آٹھویں بلند ترین چوٹی ہے۔

سرباز خان نے 8163 میٹر بلند چوٹی بغیر آکسیجن کے سر کی۔ سرباز خان چوٹی سر کرنے کے بعد آج رات واپس بیس کیمپ پہنچ جائیں گے۔

  سرباز مزکورہ چوٹی بغیر آکسیجن سر کرنے والے دوسرے پاکستانی کوہ پیما بن گئے ہیں۔ سرباز خان نے رواں برس 8 ہزار میٹر سے بلند تین چوٹیاں سر کی ہیں۔ سرباز خان نے مناسلو چوٹی سر کرنے کی مہم جوئی رواں ماہ کے پہلے ہفتے شروع کی تھی۔

واضح رہے کہ اس سے قبل پاکستانی کوہ پیما محمد علی سدپارہ نے کوہِ ہمالیہ میں واقع دنیا کی چوتھی بلند ترین چوٹی لوسے سر کی تھی ۔

8516 میٹر بلند چوٹی لوسے سر کرنے کے ساتھ ہی انہوں نے دنیا کی آٹھ ہزار میٹر سے بلند14چوٹیوں میں سے چھ سر کرنے کا اعزاز بھی حاصل کر لیا تھا۔انہوں نے 2016 میں 8126میٹربلند نانگا پربت سر کی تھی۔

ہنزہ سے تعلق رکھنے والے کوہ  پیما مرزا علی بیگ سات براعظموں میں سات چوٹیاں سر کرنے والے پہلے پاکستانی ہیں۔ مرزا علی بیگ نے 22 مئی کو مائونٹ ایورسٹ بھی سر کی تھی۔

یاد رہے کہ  اس سے قبل جولائی میں گلگت بلتستان کے ضلع نگر سے تعلق رکھنے والے واجد اللہ نے 8047 میٹر بلند چوٹی براڈ پیک سر کی تھی۔

واجد اللہ گزشتہ ماہ اپنی ٹیم کے ساتھ مہم جوئی پر روانہ ہوئے تھے،ان کا تعلق گلگت بلتستان کے ضلع نگر سے ہے وہ 8ہزار میٹر چوٹی سر کرنے والے نگر کے پہلے کوہ پیماء ہیں ۔