پاکستان مسلم لیگ (ن) پنجاب کی ترجمان عظمیٰ بخاری نے کہا ہے کہ حکومت میڈیا ورکرز کو ویکسین لگانے کے لئے فوری حکمتِ عملی بنائیں۔

تفصیلات کے مطابق پاکستان مسلم لیگ (ن) پنجاب کی ترجمان عظمیٰ بخاری نے ایک بیان میں طبی عملے کے ساتھ صحافیوں کو بھی ترجیحی بنیادوں پر کورونا وائرس کی ویکسین لگانے کا مطالبہ کر دیا۔

عظمیٰ بخاری نے کہا کہ حکومت نے صحافیوں کو کورونا کی وباء کے دوران کوئی ریلیف فراہم نہیں کیا، وفاق سمیت چاروں صوبوں کی حکومتیں میڈیا ورکرز کو مسلسل نظر انداز کر رہی ہیں۔

پاکستان مسلم لیگ (ن) پنجاب کی ترجمان نے یہ بھی کہا کہ کورونا وائرس کے باعث کئی صحافی جاں بحق ہوئے ہیں۔ 30 ہزار تنخواہ لینے والے میڈیا ورکرز 12، 12ہزار کی کورونا ویکسین کی ایک ڈوز کیسے خرید سکتے ہیں؟

عظمیٰ بخاری کا کہنا تھا کہ میڈیا ورکرز بھی فرنٹ لائن پر خدمات انجام دے رہے ہیں، میڈیا ورکرز دن رات اپنی جانیں ہتھیلی پر رکھ کر ذمے داریاں ادا کر رہے ہیں۔ ڈاکٹرز، نرسز کے ساتھ میڈیا ورکرز کی بڑی تعداد بھی کورونا وائرس کا شکار ہوئی۔

پاکستان مسلم لیگ (ن) پنجاب کی ترجمان عظمیٰ بخاری کا مزید کہنا تھا کہ اگر میڈیا کو ریاست کا چوتھا ستون سمجھا جاتا ہے تو اس کو ہرگز نظر انداز نہ کیا جائے، وفاقی اور صوبائی حکومتیں میڈیا ورکرز کو ویکسین لگانے کے لیے فوری حکمتِ عملی بنائیں۔