وزیراعلیٰ پنجاب عثمان بزدار کی معاون خصوصی برائے اطلاعات فردوس عاشق اعوان نے کہا ہے کہ پی ٹی آئی حکومت کی کاوشوں سے پہلی مرتبہ رمضان المبارک میں مہنگائی میں کمی ہوئی ہے۔

تفصیلات کے مطابق وزیراعلیٰ پنجاب عثمان بزدار کی معاون خصوصی برائے اطلاعات فردوس عاشق اعوان نے سیالکوٹ میں میڈیا سے گفتگو کرتے ہوئے کہا کہ رمضان سہولت بازاروں میں 2018 کی قیمتوں پر ضروری اشیائے خوردونوش فراہم کی جا رہی ہیں۔

فردوس عاشق اعوان نے کہا کہ پنجاب حکومت نے ماہ صیام میں عوام کو ریلیف کی فراہمی کیلئے 7 ارب روپے کا رمضان پیکیج دیا ہے جبکہ معیاری اشیاء کی سستے داموں فراہمی کیلئے صوبہ بھر میں 313رمضان بازار قائم کیے گئے ہیں۔

معاون خصوصی برائے اطلاعات کا کہنا تھا کہ شاہی خاندان الیکشن چرانا چاہتا ہے، شفاف الیکشن اس قوم کی ضرورت ہے۔

فردوس عاشق اعوان کا یہ بھی کہنا تھا کہ شہبازشریف نے الیکٹرانک ووٹنگ کی نفی کر کے اپنے اندر کا چور ظاہر کردیا۔

وزیراعلیٰ پنجاب عثمان بزدار کی معاون خصوصی برائے اطلاعات فردوس عاشق اعوان کا مزید کہنا تھا کہ دھاندلی کا پنڈوراباکس بند کرنے کا حل الیکٹرانک ووٹنگ ہے، ہم بائیو میٹرک کے ذریعے شفاف الیکشن کو یقینی بنائیں گے۔