عید الفطر پر سندھ کے تمام اسپتالوں میں ہائی الرٹ جاری کردیا گیا ہے۔

تفصیلات کے مطابق محکمہ صحت سندھ نے عید الفطر پر اسپتالوں میں ہائی الرٹ جاری کردیا جس کے بعد ڈائر یکٹر جنرل سندھ ڈاکٹر ارشاد میمن نے بھی تمام اسپتالوں کو ہدایت نامہ جاری کردیا ہے۔

اپنے بیان میں ڈی جی ہیلتھ سندھ  نے کہا کہ 9 سے 16 مئی اسپتالوں میں تمام اسٹاف اپنی موجودگی یقینی بنائے۔

ڈی جی ہیلتھ سندھ نے مزید کہا کہ تمام اسپتالوں میں ادویات اور آکسیجن مستقل فراہم کی جائے جبکہ اسپتالوں میں آئی سی یو، ایچ ڈی یو اور آپریشن تھیٹرز کو بھی مکمل فعال رکھا جائے۔

دوسری جانب اس سے قبل وزیراعلیٰ سندھ سید مراد علی شاہ کی بھی صوبے کے اہم ڈاکٹرز سے ملاقات ہوئی۔

وزیراعلیٰ سندھ سید مراد علی شاہ نے کہا کہ ڈاکٹرز سے ملاقات کا مقصد کورونا وائرس کی صورتحال کا جائزہ لینے اور کنٹرول کرنا ہے، آپ تمام ڈاکٹرز کی رہنمائی اور معاونت کی ضرورت ہے۔

سید مراد علی شاہ نے یہ بھی کہا کہ صورتحال انتہائی خطرناک ہے، کراچی میں 12.87 فیصد ، حیدرآباد 18.02 فیصد، سکھر 6.85 فیصد کورونا کے کیسز ہوگئے ہیں۔

وزیراعلیٰ سندھ سید مراد علی شاہ نے مزید کہا کہ ہمارے اسپتالوں میں آکسیجن کا مکمل انتظام ہونا چاہیے، اگر مریض کو آکسیجن بر وقت لگ جائے تو وینٹی لیٹرز پر جانے کی ضرورت نہیں ہوگی۔