پاکستان پیپلز پارٹی کے سینئر رہنما قمر زمان کائرہ نے کہا ہے کہ پاکستان کا عدالتی نظام درست نہیں ہے، اسے ٹھیک ہونا چاہیے۔

تفصیلات کے مطابق پاکستان پیپلز پارٹی کے سینئر رہنما قمر زمان کائرہ نے لاہور میں میڈیا سے گفتگو کرتے ہوئے مولانا فضل الرحمٰن کے پیپلز پارٹی اور بی اے پی سے متعلق بیان کو ایک بار پھر غیر مناسب قرار دیا۔

قمر زمان کائرہ نے کہا کہ پیپلز پارٹی نے اپوزیشن اتحاد کو نہیں چھوڑا ہے، مولانا فضل الرحمان نے جو بات کہی تھی وہ انتہائی نامناسب تھی۔ہمارے بغیر پی ڈی ایم کے اجلاس کرکے فیصلے کرنا درست نہیں تھا۔

پاکستان پیپلز پارٹی کے سینئر رہنما نے یہ بھی کہا کہ گلے شکوے اور ناراضگیاں اپنوں کےساتھ ہوتی ہیں۔ پی ڈی ایم کےکچھ دوستوں نے غیر ذمہ داری کامظاہرہ کیا، ہر جماعت کو حق ہے کہ اپنی بہتری کا سوچے۔

قمر زمان کائرہ کا کہنا تھا کہ ہم سیاسی راستے بند نہیں کرتے، پیپلز پارٹی تو اپنے مخالفین کے ساتھ گفتگو کے راستے کبھی بند نہیں کرتی۔

پاکستان پیپلز پارٹی کے سینئر رہنما کا یہ بھی کہنا تھا کہ ہمارے ہی خلاف تو دھاندلیاں ہوتی رہیں، پیپلز پارٹی ہمیشہ اپنا نقصان کرلیتی ہے لیکن سیاسی عمل کے نقصان میں آگے نہیں جاتی۔

قمر زمان کائرہ نے کہا کہ اس ملک کو صرف سیاستدان اکیلے درست نہیں کرسکتے، باقی سارے اداروں کو بھی اپنی ذمہ داری ادا کرنی ہوگی۔

پاکستان پیپلز پارٹی کے سینئر رہنما قمر زمان کائرہ نے مزید کہا کہ شہباز شریف بطور وزیراعلیٰ پنجاب بھی اپنا علاج کرانے باہر جاتے رہے ہیں۔ اب بھی شہباز شریف بیمار ہیں انہیں عدالت سے باہر جانے کی اجازت ملی تھی، انہیں روکنا مناسب نہیں۔