قومی اسمبلی کے حلقہ این اے 265 میں دھاندلی کی درخواست پر فیصلہ سنادیا گیا ۔

تفصیلات کے مطابق الیکشن ٹریبونل نے حلقہ این اے 265 سے کامیاب ہونے والے قاسم سوری کی بطور رکن قومی اسمبلی کامیابی کو کالعدم قرار دے کر حلقے میں دوبارہ الیکشن کرانے کا حکم دےدیا ۔

الیکشن ٹریبونل کے جج عبداللہ بلوچ نے حلقہ میں دوبارہ الیکشن کرانے کا حکم صادر کیا۔ فیصلہ میں کہا گیا کہ حلقہ میں ریکارڈ دھاندلی ہوئی ہے۔ ایک لاکھ 14 ہزار میں سے 65 ہزار ووٹ جعلی تھے۔

الیکشن ٹریبونل کے فیصلے کے بعد قومی اسمبلی کے ڈپٹی اسپیکر قاسم سوری ایوان کے ممبر بھی نہیں رہیں گے۔

واضح رہے کہ بلوچستان نیشنل پارٹی کے رہنما نوابزادہ لشکری رئیسانی نے قاسم سوری کی بطور ایم این اے کامیابی کو چیلنج کیا  تھا ۔

قاسم سوری کی کامیابی کو چیلینج کرتے ہوئے لشکری رئیسانی کا موقف تھا کہ این اے 265 میں انتخاب کے دوران دھاندلی ہوئی۔ اس سلسلے میں نادرا نے ووٹوں کی بایومیٹرک رپورٹ بھی ٹریبونل میں جمع کرائی تھی جس میں کہا گیا تھا کہ حلقے میں ڈالے گئے 52 ہزار ووٹوں کی تصدیق نہیں ہو سکی۔

واضح رہے کہ لشکری رئیسانی کی درخواست پر ٹریبونل کے جج عبداللہ بلوچ نے 14 ستمبر کو سماعت کے بعد فیصلہ محفوظ کیا تھا۔