پاکستان شوبز انڈسٹری کی معروف ماڈل زارا عابد کی پہلی برسی پر اداکارہ عائشہ عُمر نے اُنہیں یاد کرلیا ہے۔

کراچی میں 22 مئی 2020 کو حادثے کا شکار ہونے والی پی آئی اے کی پرواز پی کے 8303 میں جاں بحق ہونے والوں میں معروف ماڈل زارا عابد بھی شامل تھیں۔

عائشہ عُمر نے فوٹو اینڈ ویڈیو شیئرنگ ایپ اسنٹاگارم پر خصوصی اسٹوری شیئر کی ہے۔

ماڈل زارا عابد کی پہلی برسی کے موقع پر اداکارہ نے اپنی انسٹا اسٹوری میں سوشل میڈیا پیچ کی ایک خبر کا اسکرین شارٹ شیئر کیا ہے۔

 جس میں لکھا تھا کہ آج زارا عابد کو ہم سے بچھڑے ایک سال مکمل ہوگیا ہے۔‘

عائشہ عُمر نے لکھا کہ زارا کو اپنی دُعائیں میں یاد رکھیں۔

واضح رہے کہ گزشتہ سال کراچی میں حادثے کا شکار ہونے والے طیارے میں 99 افراد سوار تھے۔

محکمہ صحت سندھ کے حکام نے بتایا تھا کہ 2 مسافر محمد زبیر اور ظفر مسعود حادثے میں معجزاتی طور پر بچ گئے جبکہ 97 کے جاں بحق ہونے کی تصدیق کردی گئی تھی۔

زارا عابد پاکستان فیشن انڈسٹری میں تیزی سے اُوپر کی جانب جارہی تھیں اور گزشتہ سال انہوں نے ہم اسٹائل ایوارڈز میں بہترین فیمیل ماڈل کا ایوارڈ اپنے نام کیا تھا۔

انہوں نے انڈسٹری کے معروف ڈیزائنرز کے ساتھ کام کیا اور کیرئیر کا آغاز ثنا سفیناز کے ساتھ کیا جبکہ بہت جلد وہ عظیم سجاد کی فلم چوہدری سے بڑی اسکرین پر بھی ڈیبیو کرنے والی تھیں۔