معاون خصوصی برائے سیاسی ابلاغ ڈاکٹر شہباز گِل نے کہا ہے کہ پہلے پی ڈی ایم اور اب ن لیگ میں سیاسی رسہ کشی جاری ہے۔

تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے مولانا فضل الرحمان کے بیان پر ردعمل دیتے ہوئے کہا کہ مولانا ملک میں جاری بلا تفریق احتساب سے خائف ہیں۔

معاون خصوصی برائے سیاسی ابلاغ نے کہا کہ کرپشن اتحاد حکومتی کارکردگی سے پریشان ہو کر ایک بار پھر متحرک ہو رہا ہے، پی ڈی ایم کی جنگ عوامی نہیں کرپشن بچانے کی آخری امید ہے۔

 ڈاکٹر شہباز گِل نے یہ بھی کہا کہ ملک کی درست معاشی سمت کی وجہ سے تمام کرپٹ چیخنے پر مجبور ہوئے ہیں، مولانا اسٹیٹ بینک کے 16 ارب ڈالر ذخائر ہونے پر احتجاج کر رہے ہیں؟

معاون خصوصی برائے سیاسی ابلاغ ڈاکٹر شہباز گِل نے مزید کہا کہ پی ڈی ایم کو ڈالر مسلسل نیچے اور روپیہ مستحکم ہونے کی تکلیف ہے، مسلسل دس ماہ ترسیلات زر 2 ارب ڈالر سے زائد ہونا پی ڈی ایم کے احتجاج کی وجہ ہے۔

واضح رہے اس سے قبل پی ڈی ایم کے سربراہ مولانا فضل الرحمان نے میڈیا سے گفتگو کرتے ہوئے کہا تھا کہ اسٹیبلشمنٹ  سےمزاحمت یا مفاہمت کاعنوان غلط ہے، آئین کےدائرہ کارمیں ہرکسی کوجانا ہوگا۔

انہوں نے کہا تھا کہ 29مئی کو پی ڈی ایم کا سربراہی اجلاس طلب کیا گیا ہے ، تمام جماعتوں کی مشاورت سےمشترکہ لائحہ عمل طےکیاجائےگا، پی ڈی ایم کوعوامی قوت کےساتھ متحرک کیا جائے گا، عوام پر مسلط ناجائز حکومت کسی صورت قبول نہیں۔

پی ڈی ایم کے سربراہ نے مزید کہا تھا کہ مہنگائی سے غریب کی کمر توڑ دی گئی ہے، آئندہ بھی حکومت سے بہتری کی کوئی امید نہیں ، مرکزی مجلس شوریٰ کا موقف ہے کہ حکومت دھاندلی کی پیداوارہے، حکومت نے3سال میں ملک کودیوالیہ کردیا ہے۔