بھارت میں کورونا کے بعد فنگس نامی موذی مرض پھیل رہا ہے، اس خطرناک بیماری کی اب ایک اور نئی قسم سامنے آگئی۔

تفصیلات کے مطابق بھارت میں بلیک اور وائٹ فنگس کے بعد اب زرد فنگس بھی پھیلنے لگا ہے، اس موذی مرض کی اقسام میں سے زرد فنگس کو ماہرین نے زیادہ خطرناک قرار دیا ہے۔

ذرائع کے مطابق زرد فنگس کا پہلا مریض بھارتی ریاست اترپردیش کے شہر غازی آباد میں سامنے آیا۔

بھارت میں بی پی تیاگی نامی ڈاکٹر نے اس حوالے سے فنگس کی تینوں اقسام کا تقابلی جائزہ لیا اور یہ جاننے کی کوشش کی کہ کونسی قسم زیادہ خطرناک ہے اور انسانی جسم کے کس حصے کو نقصان پہنچاتے ہیں۔

ڈاکٹر کا کہنا ہے کہ وائٹ فنگس پھیپھڑوں پہ اثر ڈالتا ہے جبکہ بلیک فنگس دماغ کو متاثر کرتا ہے لیکن زرد فنگس زخموں کو بھرنے سے روکتا ہے۔

ڈاکٹر کا مزید کہنا ہے کہ یہ وہ فنگس کی قسم ہے جو اس سے قبل کسی انسان میں نہیں پائی گئی تھی، زرد کی علامات یہ ہیں کہ اس سے ناک بہنے اور سر درد شدید ہوجاتا ہے، یہ موذی مرض زخم بھرنے بھی نہیں دیتا۔

واضح رہے کہ بھارتی حکومت نے 20 مئی سے کورونا وائرس کے مریضوں کو بری طرح سے متاثر کرنے والی نئی بیماری ’بلیک فنگس‘ یا سیاہ پھپھوند کی سخت نگرانی کرنے کے احکامات جاری کئے تھے۔

بھارت میں حالیہ دنوں میں کورونا وائرس سے وابستہ اس نئی بیماری میں بھی کافی اضافہ دیکھا گيا ہے۔