وزیر خارجہ شاہ محمود قریشی نے کہا ہے کہ چین نے فلسطین کے مسئلے کو بہت اہمیت دی ہے۔

تفصیلات کے مطابق وزیرخارجہ شاہ محمود قریشی نے اپنے ایک بیان میں کہا کہ مسئلہ فلسطین حل کیے بغیر مشرق وسطیٰ میں امن قائم نہیں ہو سکتا۔

وزیرخارجہ نے سیکریٹری جنرل اقوام متحدہ سے کہا کہ امن عمل کا آغاز کریں۔

انہوں نے کہا کہ وزیراعظم نے امتِ مسلمہ کی وحدت کی کوششوں کو جاری رکھنے کا اعادہ کیا ہے۔

شاہ محمود نے یہ بھی کہا کہ ہمارامقصد سیز فائر تھا اور اس میں ہمیں کامیابی ملی ہے۔

شاہ محمود قریشی نے فلسطینی وزیرخارجہ کو دورہ پاکستان کی دعوت دی ہے۔

وزیرخارجہ نے کہا کہ 27 مئی کو صدر جنرل اسمبلی پاکستان آئیں گے،صدر جنرل اسمبلی نے تاریخی کردار ادا کیا ہے۔

انہوں نے یہ بھی کہا کہ ایوان کی قرارداد اقوام متحدہ کے صدر،سیکرٹری جنرل کو پیش کی ہے،متفقہ قرارداد سے میرے ہاتھ مضبوط ہوئے ہیں۔

شاہ محمود کا کہنا تھا کہ پاکستان کی تمام سیاسی جماعتوں نے فراخدلی کا ثبوت دیا ہے جس سے مسئلہ فلسطین پر مشترکہ حکمت عملی اپنانے میں کامیابی ہوئی ہے۔

شاہ محمود نے کہا کہ غزہ کی صورتحال پر سلامتی کونسل کے چار اجلاس ہوئے ہیں۔

وزیرخارجہ نے یہ بھی کہا کہ میری سلامتی کونسل کے صدر سے بھی ملاقات ہوئی ہے ،سلامتی کونسل عالمی امن کی ذمہ دار ہے جبکہ سلامتی کونسل کے 15 ارکان میں سے 14 ایک طرف اور امریکہ ایک طرف تھا۔

انہوں نے کہا کہ ترکی کے وزیرخارجہ نے فون کر کے صورتحال سے آگاہ کیا ہے۔

شاہ محمود کا کہنا تھا کہ 10 روز سے فلسطین پر مسلسل بمباری جاری تھی ،فلسطین میں نہتے بچوں کو شہید کیا گیا ہے۔

وزیرخارجہ نے کہا کہ سلامتی کونسل کسی نتیجے پر نہیں پہنچ سکی، سلامتی کونسل نے اتفاق رائے میں رکاوٹ ڈالی ہے۔

انہوں نے یہ بھی کہا کہ مسئلہ فلسطین پر چینی وزیرخارجہ کے تعاون کا شکر گزار ہوں۔

وزیر خارجہ شاہ محمود قریشی نے مزید کہا کہ ترک وزیرخارجہ نے بھی صورتحال سے آگاہ کیا، ہم نےغزہ کی صورتحال پر مشترکہ حکمت عملی اپنائی ہے۔