گزشتہ سال لاک ڈاؤن کی وجہ سےاسکول انتظامیہ نے یہ اعلان کردیا کہ بچوں کے تعلیمی سلسلے کو جاری رکھنے کے لیے کلاسیں اب آن لائن ہوں گی۔

اس اعلان کے بعد گیجٹس یعنی موبائل فون، لیپ ٹاپ اور ٹیبلٹ بڑوں سے چھن گئے اور ان میں عارضی کلاس رومز کا آغاز ہوگیا۔

انٹرنیٹ کی خراب کارکردگی کی وجہ سے بچوں کو استاد کی آواز بھی ٹھیک سے سنائی نہ دیتی۔

تاہم اس حوالے سے جب موبائل فون کمپنی میں کام کرنے والوں سے پوچھا تو پتا چلا کہ ملک میں موبائل اور کلاؤڈ بیس انٹرنیٹ کا استعمال بڑھ گیا ہے اور موبائل فون پر انٹرنیٹ فراہم کرنے کے لیے اسپیکٹرم دستیاب نہیں ہے۔

اسپیکٹرم ایک نظر نہ آنے والی ریڈیو فریکوئنسی ہوتی ہے جو ہر موبائل فون کمپنی کو الاٹ کی جاتی ہے اور اسی پر موبائل فونز کے سگنلز گردش کرتے ہیں۔

قابلِ غور بات یہ ہے کہ پاکستان میں سال 2017ء کے بعد موبائل فون کمپنیوں کو نیا اسپیکٹرم فراہم نہیں کیا جاسکا ہے۔

پاکستان میں موبائل فون اسپیکٹرم پر بڑھتے دباؤ کا اندازہ اسپیکٹرم پر منتقل ہونے والے ڈیٹا سے ہی لگایا جاسکتا ہے۔

اسپیکٹرم ڈیٹا جو سال 2018ء میں 1207 پیٹا بائیٹس تھا وہ سال 2020ء میں بڑھ کر 4498 بیٹا بائٹس ہوگیا ہے۔

اس طرح اسپیکٹرم پر منتقل ہونے والے ڈیٹا میں 272 فیصد کا نمایاں اضافہ ہوا ہے۔

ڈیٹا میں اس ہوش رُبا اضافے کی وجہ سے اسپیکٹرم ہائی وے پر ٹریفک جام ہورہا ہے۔

اسپیکٹرم کی قلت کے باعث موبائل فون پر انٹرنیٹ کی رفتار کے حوالے سے 140 ملکوں میں پاکستان 111 نمبر پر کھڑا ہے۔

حال ہی میں حکومت نے اپنی پالیسی کا مسودہ جاری کیا ہے جس میں کہا گیا ہے کہ کورونا وبا کے پھیلاؤ کے بعد انٹرنیٹ کے استعمال میں بے پناہ اضافہ دیکھنے میں آیا ہے۔

اس دوران سب سے زیادہ موبائل انٹرنیٹ کا استعمال ہوا ہے، اس لیے اسپیکٹرم کو بہتر بنانے کی ضرورت محسوس کی گئی ہے۔

اگر ملک میں انٹرنیٹ کی رفتار بہتر نہ ہوئی تو ملک میں کام کرنے والے فری لانسرز کو بھی مشکلات کا سامنا کرنا پڑے گا۔

 حکومت کو چاہیے کہ وہ اسپیکٹرم کی فروخت کے حوالے سے کنسلٹنٹ کی رپورٹ کے بجائے ماہرین کی ایک ایسی کمیٹی قائم کرے جس میں انڈسٹری اور عوامی نمائندگی کے ساتھ ریگولیٹری اتھارٹی کے لوگ شامل ہوں، پھر یہ کمیٹی نیلامی کے ساتھ ادائیگی کا ایسا طریقہ وضح کرے جس میں کمپنیاں اسپیکٹرم کے استعمال کے ذریعے پیدا ہونے والے ریونیو میں حکومت کو بھی حصہ دار بنا سکیں۔