قومی اسمبلی نے کلبھوشن سمیت فوجی عدالتوں سے سزایافتہ مجرموں کو اپیل کا حق دینے اور الیکشن ایکٹ میں ترمیم کا بل منظورکرلیا۔

تفصیلات کے مطابق قومی اسمبلی نے بھارتی جاسوس کلبھوشن پرعالمی عدالت انصاف کے فیصلے کو موثر بنانے کے لئے حقِ نظرثانی کا بل آرڈیننس 2020 منظور کرلیا۔

وزیر قانون فروغ نسیم نے فوجی عدالتوں سے سزایافتہ غیر مجرموں کو اپیل کا حق دینے کا بل پیش کیا، وفاقی وزیر قانون فروغ نسیم کے پیش کردہ بل کو قومی اسمبلی میں کثرت رائے سے منظور کیا گیا۔

فروغ نسیم نے بل کے حوالے سے ایوان میں کہا کہ یہ بل پاس نہ ہوتا تو بھارت یو این جاتا اور عالمی عدالت انصاف میں توہین کا مقدمہ درج کراتا، پاکستان کے مفاد میں اپوزیشن کو ملکر اس قانون کو منظور کرانا چاہیے تھا۔

آج اسمبلی اجلاس کے دوران اسٹیٹ بینک پاکستان ( ایس بی پی ) بینکنگ سروسز کارپوریشن ترمیمی بل 2020ء اور کاروباری تعمیر نو کمپنیات ترمیمی بل 2021ء بھی کثرت رائے سے منظور کئے گئے۔

قومی اسمبلی میں بابر اعوان نےانتخابات ترمیمی بل2020 ایوان میں پیش کیا جو کثرت رائے سے منظور کرلیا گیا جس کے تحت پاکستانی نژاد غیرملکیوں کو ووٹ کا حق ملے گا۔

دوسری جانب قومی اسمبلی میں بھارتی جاسوس کلبھوشن سے متعلق قانون سازی پر اپوزیشن نے شدید احتجاج کیا۔

 اپوزیشن ارکان نے اسپیکر ڈائس کا گھیراؤ کرلیا اور ایوان میں کلبھوشن کو پھانسی دو کے نعرے گونجتے رہے۔