پاکستان سپر لیگ (پی ایس ایل) 6 کے  26 ویں میچ میں اسلام آباد یونائیٹڈ نے پشاور زلمی کو 15 رنز سے شکست دے دی ہے۔

تفصیلات کے مطابق 185 سے زائد کے اسٹرائیک ریٹ سے ناقابل شکست سنچری بنانے پر عثمان خواجہ کو پلئیر آف دی میچ قرار دیا گیا جبکہ وہ شاداب خان کی عدم موجودگی میں اسلام آباد یونائیٹڈ کی قیادت کررہے تھے۔

[amazonad category=”Electronics”]

248  رنز پر مشتمل پہاڑ جیسے ہدف کے تعاقب میں پشاور زلمی نے مقررہ 20 اوورز میں 6 وکٹوں کے نقصان پر 232 رنز بنائے۔

پشاور زلمی کی پہلی وکٹ اننگز کی پہلی ہی گیند پر اس وقت گر گئی جب حضرت اللہ ززئی فاسٹ باؤلر عاکف جاوید کی گیند پر آؤٹ ہوگئے۔

پشاور زلمی کی دوسری وکٹ امام الحق کی صورت میں گری، وہ 35 کے مجموعی اسکور پر 7 رنز بنا کر آؤٹ ہوئے ،انہیں بھی عاکف جاوید نے آؤٹ کیا۔

تیسری وکٹ کے لئے شعیب ملک اور کامران اکمل نے 53 رنز کی شراکت قائم کی جبکہ دونوں بلے بازوں نے 150 سے زائد کے اسٹرائیک ریٹ سے رنز بنائے، جس کی وجہ سے میچ دلچسپ مرحلے میں داخل ہوگیا تاہم یہ دونوں کھلاڑی اپنی ٹیم کو فتح دلانے میں کامیاب نہ ہوسکے۔

کامران اکمل نے 32 گیندوں پر 7 چوکوں اور 2 چھکوں کی مدد سے 53 رنز کی اننگز کھیلی اور وہ حسین طلعت کا شکار بنے۔

شعیب ملک 36 گیندوں پر 6 چوکوں اور 3 چھکوں کی مدد سے 68 رنز بنا کر آؤٹ ہوئے۔

اس دوران شیرفین ردر فورڈ نے اسپنر ظفر گوہر کو ایک ہی اوور میں 4 چھکے جڑ کر میچ میں سنسنی پھیلا دی، اس اوور میں مجموعی طور پر 30 رنز بنے تاہم اگلے ہی اوور میں حسن علی نے ردر فورڈ کو آؤٹ کردیا اور وہ بھی 8 گیندوں پر 29 رنز بنا کر آؤٹ ہوئے۔

پشاور زلمی کو جیت کے لئے آخری 2 اوورز میں 38 رنز درکار تھے، ایسے میں وہاب ریاض اور عمید آصف نے ہدف کے حصول کی ہر ممکن کوشش کی تاہم وہ 15 رنز قبل ہمت ہارگئے۔

اسلام آباد یونائیٹڈ کے عاکف جاوید نے 43 رنز کے عوض 3 کھلاڑیوں کو آؤٹ کیا جبکہ حسین طلعت نے 2 اور حسن علی نے ایک وکٹ حاصل کی۔

 واضح رہے کہ وہاب ریاض 28 اور عمید آصف  20 رنز بنا کر ناٹ آؤٹ رہے۔