وفاقی وزیر برائے معاشی امور عمر ایوب کا کہنا ہے کہ ان کےغلط قرضوں کی وجہ سے ہمیں سود دینا پڑرہا ہے۔

تفصیلات کے مطابق وفاقی وزیر برائے معاشی امور عمر ایوب نے کہا کہ جی آئی ڈی سی کے 295 ارب روپے کہاں گئے؟ انہوں نے اربوں روپے کھائے اور ڈکار بھی نہیں ماری۔

انہوں نے یہ بھی کہا کہ سی پیک کے باوجود ن لیگ کے دور میں سرمایہ کاری نہیں ہوئی، اسلام آباد میں 23 ارب ڈالر کے قرضوں کا کوئی فائدہ نہیں ہوا، پنجاب حکومت نے 1200 میگاواٹ کا چوتھا ایل این جی پلانٹ منظور کیا، ایل این جی پلانٹ کی قیمت 80 ارب روپے تھی۔

عمر ایوب نے مزید کہا کہ ن لیگ نے سیکیورٹی وقانونی معاملات دیکھے بغیر پلانٹ کو منظور کیا، این پی سی سی نے ایل این جی پلانٹ خریدنے سے منع کیا، این پی سی سی نے کہا کہ ایل این جی پلانٹ 90 فیصد چلے گا ہی نہیں۔

 ذرائع کے مطابق عمر ایوب کا کہنا ہے کہ لاہور میں نندی پور پراجیکٹس پر 62 ارب روپے دینے تھے، فیول چارجز کے 62 ارب روپے کسی اور جگہ استعمال کردیے گئے، اربوں روپے کے ٹیکے لگائے گئے جس پر قانونی کارروائی کی جائے۔

انہوں نے مزید یہ بھی کہا کہ 1445 ارب روپے کی بارودی سرنگیں ن لیگ نے دیں، عمران خان نے 4 ہزار ارب روپے کا فائدہ عوام کو دیا، ن لیگ کے دور میں آرایف او کا استعمال 29 فیصد تھا، ہم نے آرایف او کا استعمال 4 فیصد کر کے اربوں روپے بچائے۔

عمرایوب کا کہنا ہے کہ 70 فیصد انرجی امپورٹڈفیول پرتھی کیونکہ ان کے کھانچے تھے، معاہدہ تھا بجلی استعمال کریں یا نہ کریں ادائیگی کرنا ہوگی، ن لیگ نے 4 ہزار میگاواٹ ری نیوایبل انرجی کوختم کیا، ایل این جی درآمد کیلئے ری نیوایبل انرجی کے پراجیکٹ کو ختم کیا گیا۔

وفاقی وزیر برائے معاشی امور عمر ایوب کا مزید کہنا ہے کہ پی ٹی آئی حکومت نے دوبارہ ری نیوایبل انرجی پراجیکٹ کوبحال کیا، سولرانرجی کا ٹیرف 24 سے ساڑھے 6 روپے ہوگیا، اسلام آباد میں ن لیگ نے سڑکیں بنائیں نہ پانی دیا، ن لیگ کی حکومت گئی تو 20 ارب ڈالر کا خسارہ تھا، اسلام آباد کی آمدن اور اخراجات میں واضح فرق تھا۔