عثمان بزدار کا کہنا ہے کہ منشیات کا کالا دھندہ کرنے والے انسانیت کے قاتل ہیں۔

تفصیلات کے مطابق وزیراعلیٰ پنجاب سردار عثمان بزدار نے انسداد منشیات کے عالمی دن کے موقع پر اپنے جاری کردہ پیغام میں کہا ہے کہ منشیات ایک ناسور ہے، منشیات کی لعنت کی وجہ سے سماجی، معاشرتی اور معاشی مسائل جنم لیتے ہیں، منشیات کا مکروہ کاروبار کرنے والوں کی جگہ جیل ہے۔

ان کا کہنا ہے کہ تعلیمی اداروں کے باہر منشیات کا کاروبار کرنے والے عناصر کی سختی سے سرکوبی کیلئے ہدایات جاری کردی گئی ہیں، نوجوان نسل کی رگوں میں زہر گھولنے والے کسی رعایت کے مستحق نہیں ہیں۔

وزیراعلیٰ پنجاب نے کہا ہے کہ منشیات کے عادی افراد کو نہ صرف نظر انداز کیا جاتا ہے بلکہ بدقسمتی سے کسی کی توجہ کا مستحق نہیں سمجھا جاتا ہے، منشیات کے عادی افراد کو بے چارگی اور کسمپرسی کی حالت میں مرنے کیلئے چھوڑ دیا جائے گا تو یہ ظلم کے مترادف ہوگا۔

انھوں نے کہا ہے کہ منشیات کی عادت کا شکار لوگ نفرت سے زیادہ ہمدردی کے مستحق ہوتے ہیں اور منشیات کے عادی افراد کی بحالی ریاست کی ذمہ داری ہے۔

ان کا مزید کہنا ہے کہ پنجاب حکومت نے اس ضمن میں جدید ہسپتال بنایا ہے، پاکستان میں یہ اپنی نوعیت کا پہلا سٹیٹ آف دی آرٹ ہسپتال ہے جہاں نشے کے عادی افراد کو معیاری علاج معالجے کی سہولتیں میسرکی جارہی ہیں۔

عثمان بزدار کا مزید کہنا ہے کہ منشیات کے خاتمے کے لئے حکومت کے ساتھ معاشرے کے دیگر طبقات کو بھی آگے آنا ہوگا اور منشیات سے پاک معاشرے کیلئے سب کو مل کر جدوجہد کرنی ہوگی۔