کورونا ایس او پیز کی خلاف ورزیوں ، وائرس کی مختلف مہلک اقسام کی موجودگی اور عید قرباں کی آمد کے پیش نظر کورونا کے پھیلاؤ کے خطرات  سے نمٹنے کے لیے  این سی او سی کی جانب سے تمام ہائی رسک سیکٹرز میں ایس او پیز پر عمل درآمد کرانے کیلئے خصوصی اقدامات کا آغاز کر دیا گیا ہے۔

تفصیلات کے مطابق  تمام صوبوں کو ایس او پیز پر سختی سےعمل درآمد کیلئے تفصیلی ھدایات جاری کردی گئی ہیں جن میں ماسک کا استعمال ، سماجی فاصلے اور حفاظتی اقدامات پر عمل درآمد کے لیے ٹیمیں تشکیل دے دی گئی ہیں۔

گلگت بلتستان ، آزاد کشمیر اور خیبر پختونخواہ میں جانے والے سیاحوں کی ہوٹل بکنگ کیلئے ویکسینیشن  جبکہ ریسٹورنٹس، جم ، سینما گھروں اور شادی ھالز کی انتظامیہ اور آنے والے افراد کیلئے بھی ویکسینیشن اور ویکسین سرٹیفیکیٹ کی تصدیق بھی لازمی قرار دی گئی ہے۔

   اس کے علاوہ بس اڈوں ، ریلوے اسٹیشن ، اندرون اور بیرون شہر چلنے والی ٹرانسپورٹ ، مساجد اور بازاروں کیلئے پہلے سے جاری ایس  او پیز پر عمل درآمد کو یقینی بنانے کی ہدایت کردی گئی ہے۔

واضح رہے کہ ان ہدایات کی روشنی میں مویشی منڈیوں اور عید سے متعلقہ ایس او پیز کے نفاذ کیلئے بھی احکامات جاری کردیے ہیں جبکہ  خلاف ورزی کرنے والے افراد اور ادارے کے خلاف  سخت کارروائی بھی عمل میں لائی جائے گی۔