اپوزیشن لیڈر سندھ اسمبلی حلیم عادل شیخ نے کہا کہ پورے سندھ میں کراچی سے سکھر تک لوگ گندا پانی پینے پر مجبور ہیں۔

تفصیلات کے مطابق اپوزیشن لیڈر سندھ اسمبلی حلیم عادل شیخ نے اپنے بیان میں کہا کہ دریا میں سکھر کا سارا گندا پانی جارہا ہے، بیگاری میں شکارپور کا گندا پانی جارہا ہے، لاڑکانہ کا گندا پانی رائیس کینال میں جاتا ہے، دادو کے گٹروں کا پانی ایم این وی ڈرین میں شامل ہوتا ہے۔

انہوں نے کہا کہ کے بی فیڈر میں کوٹری ٹھٹھہ جامشورو کا گندا اور زہریلا پانی شامل ہوتا ہے، کے بی فیڈر میں انڈسٹریل زون ، نوریا آباد کا گندا پانی جاتا ہے، یہ سارا گندا پانی کینجھر جھیل کے ذریعے کراچی کی عوام کو پلایا جاتا ہے۔

اپوزیشن لیڈر سندھ اسمبلی کا کہنا ہے کہ سندھ ماحولیاتی تحفظ ایجنسی کے وزیر بھی مرتضیٰ وہاب ہیں، جتنی این ای اوسیز ملتی ہے سب مرتضیٰ وہاب دیتے ہیں، ان این او سی کے تحت کروڑوں روپے کی رشوت لی جاتی ہے، سندھ کی عوام کو گٹروں کا ملا ہوا پانی پلایا جاتا ہے۔

حلیم عادل شیخ نے کہا کہ سندھ ماحولیاتی تحفظ ایجنسی کے تحت صاف پانی کی فراہمی ان کا کام ہے، دوسرے طرف قانون کے وزیر بھی مرتضیٰ وہاب ہیں، سندھ میں پراسیکیوشن تباہ و برباد ہوچکی ہے، عدالتوں میں عوام پریشان ہورہی ہوتی ہیں لیکن کوئی انصاف نہیں ملتا۔

اپوزیشن لیڈر سندھ اسمبلی حلیم عادل شیخ نے مزید کہا کہ مرتضیٰ وہاب کا کام صرف ٹی وی پر آکر اپنی حکومت کے گندے کام اور کرپشن کا دفاع کرنا ہے، مرتضیٰ وہاب کے پاس پہلے ہی قانون اور ماحولیات کے محکمے موجود ہیں۔