بھارتی ریاست بہار میں انتہا پسندوں کے گروہ نے مسجد میں داخل ہوکر حملہ کردیا اور وہاں موجود نمازیوں کو تشدد کا نشانہ بنایا۔

تفصیلات کے مطابق بی جے پی کی حکومتی سرپرستی میں مساجد پرایک کے بعد ایک حملے جاری ہیں، بھارتی ریاست بہار کے علاقےجہان آباد میں انتہا پسندٹولے نےمسجد پر حملہ کردیا۔

ذرائع کا کہنا تھا کہ انتہا پسند مسجد میں داخل ہوئے، وہاں موجود نمازیوں کو تشدد کا نشانہ بنایا اور ان پر ہاکی کے ڈنڈے برسائے۔

ذرائع کا مزید کہنا تھا کہ پولیس نےمحض دکھاوے کیلئےچند افراد کو گرفتار تو کیا لیکن مزید کوئی کارروائی نہیں کی۔

واضح رہے اس سے قبل 6 دسمبر 1992ء کو بھارتی نیم فوجی دستوں،ہندو انتہا پسند شیوسینا، آر ایس ایس کے غنڈوں نے حکومتی سرپرستی میں 16ویں صدی کی تاریخی بابری مسجد کو شہید کر دیا تھا۔

بابری مسجد کی شہادت کے بعد بھارت میں ہندو مسلم فسادات شروع ہو گئے تھے۔ گودھرا، گجرات ٹرین حملوں سمیت فسادات میں 3 ہزار سے زائد مسلمانوں کو شہید کیا گیا تھا۔

بابری مسجد کی شہادت کے خلاف اس وقت کے وزیراعلیٰ کلیان سنگھ اورشیو سینا کے سربراہ بال ٹھاکرے اور ایل کے ایڈوانی سمیت 49 افراد کے خلاف مقدمات تو درج کیے گئے لیکن آج تک کسی ایک حملہ آور کو بھی سزا دینے کی نوبت نہیں آئی، متاثرین انصاف کے منتظر ہیں۔