سابق وزیراعظم  نواز شریف کی مشکلات میں اضافہ، نیب نے نواز شریف کو ایک اور کیس میں گرفتار کرنے کا فیصلہ کرلیا ہے۔

ذرائع کے مطابق چئیرمین نیب نے ہوم سیکرٹری پنجاب، آئی جی اور سپرٹنڈنٹ جیل خانہ جات کوخط میں لکھا کہ نیب نوازشریف کو چوہدری شوگر ملز کیس میں نواز شریف کو گرفتار کرنا چاہتی ہے۔

ذرایع کا کہنا تھا کہ چیئرمین نیب چوہدری شوگر ملز کیس میں نواز شریف کے وارنٹ گرفتاری بھی جاری کر چکے ہیں۔

ذرایع کا یہ بھی کہنا تھا کہ نیب چوہدری شوگر ملز کیس میں میاں نواز شریف سے تفتیش کرنا چاہتی ہے، نیب جوائنٹ انوسٹی گیشن نے شکوہ کیا ہے کہ نواز شریف جیل میں تفتیش کے دوران بالکل تعاون نہیں کرتے۔

ذرایع کا مزید کہنا تھا کہ چوہدری شوگر مل کیس میں نیب ٹیم آیندہ ہفتے جیل میں نواز شریف سے تحقیقات کے لیے جائے گی۔

واضح رہے کہ اس سے قبل احتساب عدالت اسلام آباد نے العزیزیہ اور فلیگ شپ ریفرنسز کے 19 دسمبر کو محفوظ کئے گئے فیصلےسنا تے جس میں نوازشریف العزیزیہ ریفرنس میں مجرم قرار پائے اور عدالت نے انہیں 7سال کی قید، 10سال کی نا اہلی اور 25ملین ڈالر جرمانے کی سزا سنائی تھی۔

احتساب عدالت نے العزیزیہ ریفرنس کیس میں  نوازشریف کی جائیداد ضبط کرنے کا حکم دے دیا تھا۔

العزیزیہ ریفرنس میں نواز شریف کو 1.5ملین پاؤنڈ کا جرمانہ بھی کیا گیا جب کہ انہیں فلیگ شپ ریفرنس میں با عزت بری کر دیا گیا تھا۔