ترجمان دفتر خارجہ کا کہنا ہے کہ بھارت ایف اے ٹی ایف کو سیاست کا شکار کر کے اس کے کردار کو گھٹارہا ہے۔

تفصیلات کے مطابق پاکستان کو ایف اے ٹی ایف کی گرے لسٹ میں رکھنے کے بھارتی عدم اتفاق کے کردار پر بھارتی وزیرخارجہ کے 18 جولائی کے بیان پر ترجمان دفتر خارجہ نے بیان جاری کیا ہے۔

https://twitter.com/ForeignOfficePk/status/1416988931493699585

بیان میں ترجمان کا کہنا ہے کہ بھارتی بیان نے نہ صرف اس کی اصلیت عیاں کردی ہیں بلکہ ایف اے ٹی ایف میں بھارتی منفی کردار کے حوالے سے پاکستان کے طویل مدتی موقف کو بھی درست ثابت کیا ہے۔

انہوں نے کہا ہے کہ ایکشن پلان پر عملدرآمد کے دوران پاکستان مخلصانہ اور تعمیری انداز میں ایف اے ٹی ایف سے رابطے میں ہے لیکن پاکستان کی پیشرفت پر بھارت بھونڈے ذرائع سے شک ظاہر کرنے کا ہرممکن طریقہ اختیار کرتاہے۔

ترجمان کا کہنا تھا کہ پاکستان ھمیشہ سے عالمی برادری پر واضح کرتا آیا ہے اور ماضی میں پاکستان باربار بھارت کے نقلی کردار کو عالمی برادری کے سامنے لاتا رہا ہے۔

انہوں نے واضح کیا ہے کہ بھارت کے حالیہ اعتراف کو بھی ایف اے ٹی ایف کے نوٹس میں لایا جائے گا کیونکہ بھارتی حکومت کے حالیہ اعتراف کے بعد ایف اے ٹی ایف میں پاکستان کا جائزہ لینے کیلیئے جوائنٹ گروپ کے شریک چیئرمین کے طور پر بھارت کا کردار مشکوک ہوگیا ہے۔

ترجمان کا کہنا تھا کہ دھوکہ بازی سے پاکستان پر دباؤ ڈالنے کی بھارتی کوشش ہمیشہ ناکام رہی ہے اور اس کوشش کو کبھی کامیابی حاصل نہیں ہوگی۔