مشیر خزانہ ڈاکڑ عبدالحفیظ شیخ نے کہا ہے کہ حکومت کی طرف سے تجارت اور ٹیکس اصلاحات کے نتائج برآمد ہورہے ہیں۔

تفصیلات کے مطابق مشیر خزانہ ڈاکڑ عبدالحفیظ شیخ نے اپنے ایک بیان میں کہا ہے کہ پاکستان کی معیشت کے استحکام کےلئے اٹھائے گئے اقدامات کا ثمر حاصل ہونا شروع ہوگیا ہے۔

مشیر خزانہ ڈاکڑ عبدالحفیظ شیخ نے مزید کہا کہ گزشتہ مالی سال میں اٹھائے گئے اقدامات ملک کو پائیدار استحکام و ترقی کی طرف لیکر جارہے ہیں۔

واضح رہے گزشتہ روز انجمن تاجران اور سوتر منڈی کے تاجروں کے ایف بی آر کے ساتھ مزاکرات نا کام ہونے کے بعد تاجروں نے میڈیا سے گفتگو میں کہا تھا کہ ایف بی آر ہماری بات نہیں سن رہا، نہ ہمارا مؤقف سمجھ رہا ہے، ایف بی آر کو کاروباری طبقے کو سہولتیں دینا ہوں گی۔

تاجر رہنماؤں کا مزید کہنا تھا کہ 28 اور 29 اکتوبر کو ملک بھر میں شٹر ڈاؤن ہڑتال ہوگی، جب کہ 15 اکتوبر سے ایک گھنٹے کی ٹوکن ہڑتال کی جائے گی۔

یاد رہے کہ اسلام آباد میں تاجر تنظیموں کے اجلاس سے خطاب کرتے ہوئے مرکزی تنظیم تاجران پاکستان کے صدر محمد کاشف چوہدری نے کہا تھا کہ تاجر برادری کی طر ف سے ایف بی آر کو دی گئی ڈیڈ لائن گزرنے میں 72 گھنٹے باقی رہ گئے ہیں ، حکو مت اور ایف بی آر معیشت دشمن پالیسیوں کو زبر دستی کارو باری طبقے پر نافذ کر نے سے گریز کر ے اور اگر تاجروں کے چارٹر آف ڈیمانڈ اور مطالبات منظور نہ کیے گئے تو ملک گیر شٹر ڈاون کی تاریخوں کا اعلان کریں گے۔